İşğal etilgen Qırımda Tayğan yapma gölüniñ faydalı suv seviyesi qalmadı, yani ealiniñ ihtiyacları içün qullanmaq mümkün olğan strategik suv yedegi yoq.
"Qırım.Aqiqat"qa Qırım memleketşınası anonim şeklinde bunı bildirdi.
"Bu sene Qırımda quru ava şaraitinde Qarasuvbazar ve Tayğan yapma gölleriniñ suv resursları Şimaliy-Qırım kanalınıñ suv anbarlarını toldurıp, şarqiy Qırım ealisini suvnen temin etmek içün qullanıla. Bu sene Büyük Qarasuv özeniniñ yuqarı qısmında gidrologik vaziyetniñ fenalaşması Tayğan yapma gölüniñ suv yedeklerine menfiy tesir etti. İlk yaz ayından berli Tayğan yapma gölüniñ faydalı suv seviyesi qalmadı, suvnı bu şaraitte almaq imkânsız", — dep aytıla haberde.
"Qrım.Aqiqat"nıñ malümatına köre, Qarasuvbazar yapma gölüniñ yanında yerleşken yapma gölünde de suv seviyesi pek tüşe. Bu, sıcaqlıq sebebinden, em de işğalli akimiyet yarımadanıñ cenübiy-şarqiy qısmını temin etmek içün ondan Büyük Qarasuv özenine suv tökülmesini quvetleştirgeni sebebinden oldı.
İşğalciler, tatil mevsiminde Qırım içilir suvınen 60%-i temin etilecegini bildirdiler. Qırımnıñ yalı boyundaki kurort şeerleri ve meskün yerleri de toqtamayıp suvnen temin etilecek, dep "Sputnik Krıma" radiosınıñ canlı yayınında Rusiye kontrolindeki Qırım parlamentiniñ ekologiya ve tabiat resursları eyyetiniñ reisi Svetlana Şabelnikova bildirdi.
"Keçenlerde biz kurort mevsiminde Qırımnı temiz içilir suvınen temin etmege azırlıq eyyetiniñ toplaşuvını keçirdik. Aytmağa isteyim ki, bu mevsim — yağanaqlar yağmağanına baqmadan, baar qarı ve yağanaqlar bizge biraz yardım etti — 60%-ge içilir resurslarnen temin etilecek", — dedi Şabelnikova.
İşğal etilgen Qırımda tabiiy aqıntılı yapma gölleriniñ suv yedekleri tahminen 126 million kubometrni teşkil ete. Teñeştirmek içün, keçken sene bu raqam 224 million kubometrni teşkil etti. Bu aqqında "Suspilne. Qırım"ğa "Kıyiv-Moğıla akademiyası" Milliy universitetiniñ tabiat ilimleri fakultetiniñ dekanı Yevgen Hlobıstov tarif etti. Onıñ aytqanına köre, yapma göllerindeki suvnıñ eksilüviniñ sebebi Rusiye ordusı tarafından işğal etilgen soñ yarımadağa qanunsız olaraq köçken ruslar oldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
