İşğalciler bildirdiler ki, tatil mevsiminde Qırım içilir suvnen 60%-ge temin etilecek. Sıñırsız resurslar tek Cenübiy yalı boyundaki kurort şeerleri ve meskün yerlerine berilecek.
Rusiye kontrolindeki Qırım parlamentiniñ ekologiya ve tabiat resursları eyyetiniñ reisi Svetlana Şebelnikova "Sputnik Krıma" radiosınıñ canlı yayınında bunı bildirdi.
"Evel biz, kurort mevsimi içün Qırımnı temiz içilir suvnen temin etüvnen bağlı azırlıq eyyetiniñ toplaşuvını keçirdik. Aytmağa isteyim ki, bu mevsim — yağanaqlar yağmağanına baqmadan, baar qarı ve yağanaqlar bizge biraz yardım etti — 60% aşayt resurslarınen temin etilecek", — Şabelnıkova dedi.
40% eksikligini nasıl qapatacaqlarını aytmadı.
Hatırlatamız ki, bozarğan aynıñ 6-nda "Qırım.Aqiqat" (Radio Svobodanıñ leyhası) neşirine yerli yerşınası Biloğirsk (QarasuvbazarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) yapma gölünde suv seviyesi pek tüşkenini bildirdi. Buña sıcaq tesir ete, em de işğalli akimiyet yarımadanıñ cenübiy-şarqındaki ihtiyacları içün ondan Büyük Qarasuv özenine suv tökülmesini arttırdı.
İşğal etilgen Qırımdaki yapma gölleriniñ tabiiy aqıntısı 126 million kubometr suv yedegi bar. O vaqıt suv yedekleri 224 million kubometrni teşkil ete edi. Suspilne Qırımğa "Kıyiv-Moğıla akademiyası" Milliy universitetiniñ tabiat ilimleri fakultetiniñ dekanı Yevğen Hlobıstov bu aqqında aytıp berdi. Onıñ aytqanına köre, yapma göllerindeki suvnıñ eksilmesiniñ sebebi yarımada Rusiye ordusı tarafından işğal etilgen soñ yarımadağa qanunsız köçken ruslar oldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
