Bozarğannıñ 4-nde Rusiyeniñ Cenübiy bölgeniñ arbiy mahkemesinde "Hizb ut-Tahrir" teşkilâtında iştirak etkeni içün taqip etilgen altı qırımtatar faalcisiniñ davasında qabaatlav şaatınıñ sorğusı keçirildi. Mahkeme oturışında şaat Ruslan Bayirov FSB versiyasını desteklegen evelki şaatlıqlarını red etti. Advokatlar esaslı ziddiyetlerge diqqat ete.
Advokatlar Edem Semedlâyev ve Emil Kurbedinov "Qırım birdemligi"ne bunı bildirdiler.
Semedlâyevniñ aytqanına köre, tahqiqat basamağında Bayirov FSB hadimleriniñ versiyası içün yazılı şaatlıq etti, amma mahkemede, 2014 senesine qadar islâm firqasınıñ faaliyetinen tanış olğanını ayttı. O, bu teşkilâtnıñ terroristik areketler, zorbalıq ya da terrornen alâqası bar olğanını bilmey, dep qayd etti. Bundan da ğayrı, o, teşkilâtnıñ ne içün Rusiyede terroristik cedvelge kirsetilgenini bilmey.
"Bayirov añlattı ki, onıñ bilgenine köre, teşkilât azalarınıñ esas maqsadı — arap memleketlerinde islâm ükümeti şeklinde devlet qurmaqtır", — dep advokat Semedlâyev tarif etti.
Partiya azaları bu maqsatqa zorbalıqsız yolnen irişmege niyetlene, şunıñ içün olar terroristik faaliyetke alâqası bar olğanını inkâr eteler.
Prokuror, Bayirovnıñ tahqiqat basamağında bergen yazılı şaatlıqlarını ilân etmege rica etti. Mahkemeci Roman Saprunov bu muracaatnı qanaatlendirdi, ve vesiqalar mahkemede oqundı.
Advokatlar, Bayirovnıñ tahqiqatçığa aytqanları ve mahkemede aytqanları arasında farqlılıqlar bar olğanını qayd ettiler. Hususan, sabıq şaatlıqta o, "Hizb ut-Tahrir azaları Rusiye Federatsiyasınıñ siyasiy sistemasını ve devlet qurulışını deñiştirmege isteyler", dep iddia ete edi. Amma oturış vaqtında Bayirov aksinesini ayttı: "Hizb ut-Tahrir azaları Rusiye Federatsiyasınıñ devlet qurumını deñiştirmege maqsad olaraq qoymaylar". Advokat Semedlâyev bu qarışıqlıqlarnıñ sebepleri aqqında sual berdi, amma mahkemeci onı lâğu etti.
Kelecek mahkeme oturışı bozarğannnıñ 16-nda planlaştırıla. FSB hadiminiñ sorğusı beklenile.
"Hizb ut-Tahrir davası"nıñ beşinci Bağçasaray gruppası aqqında ne bilemiz
2023 senesi arman ayınıñ 24-ünde rus quvetçileri, qırımtatar Ruslan Asanov, Seydamet Mustafayev, Remzi Nemetulayev, Abdulmecit Seitumerov, Amethan Umerov ve Eldar Yakubovnıñ evlerini tinteler.
Beş adam, cemaat faalcileri ve çoq balalı babalardır. Keçenlerde Seitumerovnıñ balası doğdı. Abdulmecit, 2020 senesi saban ayında teqif etilgen, 17 ve 14 senege maküm etilgen Bağçasaraydan süyasiy mabüsler olğan Osman ve Seitumer Seitumerovnıñ doğmuş qardaşıdır.
Terrorcılıqta qabaatlanıp tevqif etilgen başqa qırımtatarlarnı destek etici numayışlarda bütün altı Bağçasaray faalcisini bir qaç kere tuttılar.
Nimetulayev ve Mustafayevni bir qaç künge tevqif ettiler. İşğalciler, "vatandaşlarnıñ kütleviy bulunmalarınen içtimaiy nizamnı bozğanı içün" Yakubovğa 10 biñ rublelik para cezasını berdiler. Umerov ise mahsus tutun müessisesinde bir qaç kün keçirdi ve "FV ya da telükesi vaqtında qaidelerni riayet etmeme aqqında" aynı maddege mücibi para cezasını ödedi.
2023 senesi berim ayında "UFSBniñ ayrıca müim meseleler üyken taqiqatçıcı" Vitaliy Vlasov Yakubovğa ve davanıñ başqa iştirakçisiniñ apayı Feride Halilovağa aqaylarınen körüşmege izin bermedi. Beşinci Bağçasaray gruppasınıñ iştirakçileriniñ apayları aynı rednamelerni aldılar.
Hizb ut-Tahrir, islâm siyasiy fırqasıdır. 2023 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
2024 senesi orta küz ayınıñ 21-nde Rostov-na-Donu Cenübiy bölgesiniñ arbiy makemesi, yañı deliller olmağanına baqmadan, Abdulmecit Seitumerov ve beşinci Bağçasaray gruppasınıñ başqa mabüsleriniñ apis müddetini daa eki ayğa uzattı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
