Kiçik aynıñ 3-nde Rusiyeniñ Cenübiy bölge makemesinde beşinci Bağçasaray gruppası davasınıñ qabaatlayıcı tarafınıñ muracaatınen bağlı oturış olıp keçti. Olarnıñ taqiqat izolâtorında bulunma müddetleriniñ soñuna köre apis müddetiniñ uzatılmasını talap etildi.
Bunı advokat Edem Semedlâyev bildirdi.
"Prokuror taqiqat tedbirini daa üç ayğa uzatmağa rica etti. Onıñ aytqanına köre, bunı yapmasalar, olar gizlene, şaatlarğa tesir ete, delillerni yoq ete bilirler. Qısqadan, er vaqıtki aytqanları kibi. Oğlanlar bunı red ettiler, imayeci taraf da bunı red etti", — dep advokat añlattı.
O şunı da qoştı ki, makemeniñ er bir oturışında imayeciniñ delillerine kimse diqqat etmey.
"Bugünki oturışta adamlarnıñ tevqif müddetleri daa üç ayğa uzatıldı. Bu qararnı red etecekmiz ve ümüt etemiz ki, delillerimiz diñlenecek ve ev apisinde tutmaq içün ihtiyat tedbirini deñiştirecekler", — dep Edem Semedlâyev qoştı.
Nevbetteki makeme oturışı saban ayınıñ 10-nda olacaq.
"Hizb ut-Tahrir davası"nıñ beşinci Bağçasaray gruppası aqqında ne bilemiz
2023 senesi arman ayınıñ 24-ünde rus quvetçileri, qırımtatar Ruslan Asanov, Seydamet Mustafayev, Remzi Nemetulayev, Abdulmecit Seitumerov, Amethan Umerov ve Eldar Yakubovnıñ evlerini tinteler.
Beş adam, cemaat faalcileri ve çoq balalı babalardır. Keçenlerde Seitumerovnıñ balası doğdı. Abdulmecit, 2020 senesi saban ayında teqif etilgen, 17 ve 14 senege maküm etilgen Bağçasaraydan süyasiy mabüsler olğan Osman ve Seitumer Seitumerovnıñ doğmuş qardaşıdır.
Terrorcılıqta qabaatlanıp tevqif etilgen başqa qırımtatarlarnı destek etici numayışlarda bütün altı Bağçasaray faalcisini bir qaç kere tuttılar.
Nimetulayev ve Mustafayevni bir qaç künge tevqif ettiler. İşğalciler, "vatandaşlarnıñ kütleviy bulunmalarınen içtimaiy nizamnı bozğanı içün" Yakubovğa 10 biñ rublelik para cezasını berdiler. Umerov ise mahsus tutun müessisesinde bir qaç kün keçirdi ve "FV ya da telükesi vaqtında qaidelerni riayet etmeme aqqında" aynı maddege mücibi para cezasını ödedi.
2023 senesi berim ayında "UFSBniñ ayrıca müim meseleler üyken taqiqatçıcı" Vitaliy Vlasov Yakubovğa ve davanıñ başqa iştirakçisiniñ apayı Feride Halilovağa aqaylarınen körüşmege izin bermedi. Beşinci Bağçasaray gruppasınıñ iştirakçileriniñ apayları aynı rednamelerni aldılar.
Hizb ut-Tahrir, islâm siyasiy fırqasıdır. 2023 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
2024 senesi orta küz ayınıñ 21-nde Rostov-na-Donu Cenübiy bölgesiniñ arbiy makemesi, yañı deliller olmağanına baqmadan, Abdulmecit Seitumerov ve beşinci Bağçasaray gruppasınıñ başqa mabüsleriniñ apis müddetini daa eki ayğa uzattı.
Telegram, WhatsApp ve Facebookta Suspilne Qırım haberlerine abune oluñız
