Orta küz ayınıñ 21-nde Rostov-na-Donudaki Cenübiy bölge arbiy makemesi Abdulmecit Seitumerov ve "Hizb ut-Tahrir davası"nıñ beşinci Bağçasaray gruppasınıñ başqa mabüsleriniñ apis müddetini daa eki ayğa uzattı.
Bunı Abdulmecit Seitumerovnıñ advokatı Emil Kurbedinov bildirdi.
"Qabaatlayıcı taraf apis müddetiniñ uzatılması aqqında muracaatını qabaatlanğanlarnıñ qaçıp ketmesi ya da şaatlarğa tesir etmesi ihtimalına esasladı, amma yañı deliller berilmedi", — dep izaatladı Kurbedinov.
İmayeciler, mabüsleriniñ müsbet hususiyetleri bar, zorbalıqta qabaatlanmaylar ve SİZOda tutulğanda qanunlarğa riayet eteler, dep qayd ettiler. Amma makeme kene de qabaatlayıcı tarafnıñ muracaatını qanaatlendirdi.
Nevbetteki oturış 2024 senesi boş aynıñ 18-ne belgilendi, anda qabaatlayıcı tarafnıñ şaatları sorğuğa çekilecek. Advokatnıñ aytqanına köre, siyasiy mabüslerniñ maneviy vaziyeti stabil qala, amma taqiqat izolâtorında uzun müddetke tutuluv şaraiti sağlıqlarına menfiy şekilde tesir ete.
"Hizb ut-Tahrir davası"nıñ beşinci Bağçasaray gruppası aqqında ne bilemiz
2023 senesi arman ayınıñ 24-ünde rus quvetçileri, qırımtatar Ruslan Asanov, Seydamet Mustafayev, Remzi Nemetulayev, Abdulmecit Seitumerov, Amethan Umerov ve Eldar Yakubovnıñ evlerini tinteler.
Beş adam, cemaat faalcileri ve çoq balalı babalardır. Keçenlerde Seitumerovnıñ balası doğdı. Abdulmecit, 2020 senesi saban ayında teqif etilgen, 17 ve 14 senege maküm etilgen Bağçasaraydan süyasiy mabüsler olğan Osman ve Seitumer Seitumerovnıñ doğmuş qardaşıdır.
Terrorcılıqta qabaatlanıp tevqif etilgen başqa qırımtatarlarnı destek etici numayışlarda bütün altı Bağçasaray faalcisini bir qaç kere tuttılar.
Nimetulayev ve Mustafayevni bir qaç künge tevqif ettiler. İşğalciler, "vatandaşlarnıñ kütleviy bulunmalarınen içtimaiy nizamnı bozğanı içün" Yakubovğa 10 biñ rublelik para cezasını berdiler. Umerov ise mahsus tutun müessisesinde bir qaç kün keçirdi ve "FV ya da telükesi vaqtında qaidelerni riayet etmeme aqqında" aynı maddege mücibi para cezasını ödedi.
2023 senesi berim ayında "UFSBniñ ayrıca müim meseleler üyken taqiqatçıcı" Vitaliy Vlasov Yakubovğa ve davanıñ başqa iştirakçisiniñ apayı Feride Halilovağa aqaylarınen körüşmege izin bermedi. Beşinci Bağçasaray gruppasınıñ iştirakçileriniñ apayları aynı rednamelerni aldılar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız