İşğalciler Yalta mekteplerinde on birinci sınıf talebeleri içün sınıf saatlerini keçirdiler, anda olarğa "Rusiye ordusında hızmet etmek — tuvğan toprağı içün yapıla bilecek eñ yahşı şey" dep añlatılğan ediler.
"Sarı şerit" areketi bunı bildirdi.
Areket iştirakçileriniñ qayd etkenlerine köre, kiriş kampaniyasından evel keçirilgen tematik dersler Rusiyede ve işğal etilgen topraqlarda standart bir şeydir.
"Ancaq, adetince, balalarnı askerlikke çağıruv, olarnıñ imtianlarğa azırlanıp, aliy oquv yurtlarına kirmege daa çoq teşviq etilmesi içün "qorqutuv" edi. 2025 senesidir, ve talebelerge bir şey yapmamağa, amma hızmet etmege tevsiye etüv usulı endi deñişti. Rusiye Federatsiyasında tasilniñ bozuluvı ve er ay artacaq Rusiye ordusınıñ kadrlar açlığınıñ açıq numayışı", — dep aytıla haberde.
Hatırlatamız ki, çiçek ayınıñ 3-nde yarımadada balalar ve gençlerniñ arbiyleştirilüvi aqqında "Almenda" vatandaşlıq maarif merkezi haber etti. 2025 senesi çiçek ayına işğal etilgen Qırımda 260 kadet sınıfı bar edi. Keçken oquv yılınıñ soñunda 197 böyle sınıf bar edi, yani yıl devamında 63 yañı sınıf açıldı. Bundan da ğayrı, 16 kazak sınıfı bar. Umumen yarımadanıñ mekteplerinde 6265 bala arbiy işlerni ögrene, dep aytıla haberde.
İşğal etilgen topraqlarda "Yunarmiya"ğa celp etilgen balalarnıñ sayısı da arttı. 2017 senesi Qırımda olarnıñ sayısı bir buçuq biñ olsa, 2024 senesi boş ayda — 15 biñden çoq oldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
