Qırımda işğalciler mektep talebelerini mayıs ayınıñ 9 kününe bağışlağan tedbirlerde iştirak etmege mecbur eteler. Hususan, yarımadada "Portal 45/25" "forumı" teşkil etildi, oña 200 bala toplandı.
Milliy muqavemet merkezi (MMM) bunı bildirdi.
"200 balanı “qaraman yolu“nı keçmege mecbur ettiler. Tarih yerine "qurtarıcı Rasiye" aqqında agressiv teşviqat. Tarihiy aqiqatnı zorbalıq ibadetinen deñiştireler. Rusiye Ukrayinlerniñ Ekinci Cian cenkindeki iştiragini yoq ete ve bugün de istilâcı olıp qazanğan ğalebe içün küreşe", — dep aytıla haberde.
Hatırlatamız ki, çiçek ayınıñ 3-nde yarımadada balalar ve gençlerniñ arbiyleştirilüvi aqqında "Almenda" vatandaşlıq maarif merkezi haber etti. 2025 senesi çiçek ayına işğal etilgen Qırımda 260 kadet sınıfı bar edi. Keçken oquv yılınıñ soñunda 197 böyle sınıf bar edi, yani yıl devamında 63 yañı sınıf açıldı. Bundan da ğayrı, 16 kozak sınıfı bar. Umumen yarımadanıñ mekteplerinde 6265 bala arbiy işlerni ögrene, dep aytıla haberde.
İşğal etilgen topraqlarda "Yunarmiya"ğa celp etilgen balalarnıñ sayısı da arttı. 2017 senesi Qırımda olarnıñ sayısı bir buçuq biñ olsa, 2024 senesi boş ayda — 15 biñden çoq oldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
