Çiçek ayınıñ soñunda işğal etilgen Qırım mayısnıñ 9-na azırlıq dalğasına daldı: soqaqlar Georgiy şeritlerinen yaraştırıldı, yañı teşviqat divar resimleri peyda oldı, mektep çañları ise «Katüşa» sovet yırınıñ avasınen deñiştirildi. Tek Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda), işğalli gubernator Mihayil Razvojayevniñ beyanatına köre, 300-den çoq tedbir planlaştırıla — avtomobil yarışlarından başlap, balalar içün «tank çapışmaları»na qadar.
Siyasetşınas Yevğeniya Ğörünova Suspilne Qırımğa zemaneviy cenkte aqiqiy ğalebelerniñ olmağanı sebebinden Rusiye sovet keçmişine asretlikni istismar ete, dep ayttı.
"Zemaneviy dünyada Rusiyeniñ ğalebeleri yoq. Pek çoqtan berli ğalebeleri yoq, amma eñ olmağanda, bir qaç ğalebeler olmaq kerek. Ve iqtisadiyat yaramay olğanda, neftdollarları bar, amma olar er kes içün degil, biz añlaymız. Tasil yaramay, tibbiyet yaramay, er şey yaramay. Yañı tehnologiyalar yoq ve ilâhre, amma nasıldır ğalebe qazanmağa isteyler. Bunıñ içün içtimaiy sorğuğa baqsaq, Rusiyeniñ eñ büyük muvafaqiyetleri – bu tamam Ekinci cian cenkindeki ğalebesidir», — dep Ğörünova qayd etti.
İşğal etilgen Qırımnıñ soqaqları bu künlerde Ukrayina qanunlarınen yasaq etilgen Georgiy şeritleri ve başqa timsallernen toldurıla. Mayıs ayınıñ 9-na ruslar Sankt-Peterburgdan Rusiyeniñ 70 şeerinden keçip, işğal etilgen Ukrayin Sevastopolına (Aqyarına) barğan teşviqat poyezdini yolğa çıqardılar.
Bu arada Udmurt Cumhuriyetiniñ Sarapul şeerinde sakinler «ğalebe treni» yanında bedava qara boğday botqası içün nevbetke turdılar. Platformalarda, Ekinci cian cenki yırlarınen teşviqat etip, ruslarğa «içtimaiy kefaletler» ve imtiyazlar vadelerinen Rusiye ordusında hızmet etmek içün añlaşma imzalamağa teklif etile edi.
"Olar öz "top eti"ni istegenleri kibi tez toldurıp olamaylar. Böyle büyük memleketke baqmadan, olarnıñ adamları yetişmey, amma olar umumiy seferberlik ilân etmege istemeyler, çünki bu memleket içün de tenqidiy ola bilir. Şunıñ içün olar çeşit variantlarnı qıdıralar", — dep siyasetşınas fikrini bildirdi.
Balalar içün de teşviqat leyhaları teşkil etildi. Meselâ, işğalciler Keriçniñ bir meydanında mektepten evelki yaşındaki balalar içün «tank alanı»nı qurdılar. Sevastopol (Aqyar) mekteplerinde talebeler «SVO iştirakçileri» içün levhalarnı yaratmaq kerek edeler – bunı Rusiye Federatsiyası Ukrayinağa qarşı cenk dep adlandıra. «Sarı şerit» muqavemet areketiniñ malümatına köre, ana-babalar çıqıştan açuvlandılar ve bazıları hastalıq ya da qoranta vaziyeti sebebinden balalarını mektepke yibermediler.
Şu şeerde de aftanın başında işğalli gubernator Mihayil Razvojayev bildirdi ki, «telüke sebebinden» parad olmaycaq. Şunıñ içün «Sarı şerit»niñ malümatına köre, mekteplerde balalarnı şura urbasına kiydirip, evelden teşviqat videolarını çıqardılar
Yevğeniya Ğörünova mayısnıñ 9-ı mevzusında balalarnıñ arbiyleştirilüvi atta bebeklerge da tesir etti, dep qayd etti.
"Bu daa, bilesiñizdir, başlanğıç. Anda daa beter şeyler bar. Meselâ, bazı bölgelerde qadınlar doğum evlerinden çıqarılalar, ve olar bu bebeklerni bu qalpaqlarğa qoyalar, bu haki tüsteki qundaqqa saralar. Bu, kerçekten de, ola bilgen eñ qorqunçlı şeydir", — qayd etti o.
«Ğalebe künü»niñ 80 yıllığına baqmadan, Rusiyede ve Ukrayina toprağında üçünci yıl ardı-sıra, tolu miqyaslı tecavuz başlanğanından berli «Ölmez polk» yürüşi lâğu etildi. Mütehassısnıñ aytqanına köre, işğalciler adamlar 1941-1945 seneleri degil de, Ukrayinada cenk vaqıtında elâk olğan soy-soplarınıñ portretlerinen çıqacağından qorqalar.
Ukrayina Prezidentiniñ Qırım Muhtar Cumhuriyetinde toplağan açıq menbalardan malümatlarğa köre, 2022 senesinden başlap Ukrayinağa qarşı cenkte aman-aman 2 biñ Qırım sakini elâk oldı. İşğal etilgen Qırımda bu cenkteki ğayıplar aqqında aytılmay. Kütleviy malümat institutı dedi ki, yarımadadaki işğalciler umumen Ukraiyna mevzusından qaçınalar, onıñ yerine sovet keçmişini teşviq eteler.
"Bugunki rus kontseptsiyası şunda ki, Rusiye "qamaçavdaki qale"dir, o, daima cenkleşmege azır olmaq kerek. Buña köre, halq öz memleketini qorçalamağa azır olmaq kerek. Eger siz Ukrayinadaki rus cenk esirlerinen intervyularnı seyir etseñiz, olardan: "Ne içün siz mındasıñız?" sorağanda "Men mında Rusiyeni qorçalayım", dep cevap bereler. Rusiyeniñ Luğansk, Harkiv vilâyetlerine ne alâqası bar olğanını ise bilmeyler», — dep siyasetşınas qayd etti.
Onıñ aytqanına köre, Rusiyede arbiyleştirüv akimiyetke cemiyetni nezaret etmek, cemiyetni olarğa faydalı olğan tarafqa yöneltmek içün şarait yarata.
"Olar añlaylar ki, şimdi aynı arbiyleştirüvge, añnıñ, hususan yaşlarnıñ arbiyleştirilüvine çoq para sarf etmek kerekler, çünki bu olarnıñ kelecegi "top eti"dir. Ve şunıñ içün olar buña para sarf eteler ve daa çoq sarf etecekler. Menim bilgenime köre, Qırımda er bir tasil içün paranıñ miqdarı da yılı ve bu devam etecek, olar er şeyge qıtacaqlar, amma bu miy yuvuvına deli kibi para sarf etecekler, çünki olar içün bu rejimniñ sağ qalması meselesidir», — dep Ğörünova qayd etti.
Şu cümleden, ruslar «Yunarmiya» kibi çeşit teşkilâtlar vastasınen yaşlarnı faal sürette arbiyleştireler. Anda olarnı silânen qullanmağa ögreteler, şuralar tarihını ögreneler, arbiy urba kiymege ögreteler. Siyasetşınas Putinniñ kelecek cenklerinde asker olmaq içün ögretilgen bu balalarnı «rejimniñ temeli» dep adlandıra.
"Bu alda ğalebe kultı bu cenk kultınıñ devamı kibidir. Yani Rusiye rus tilinde, Kreml mantığında cenkleşmege mecbur. Rusiye ise cenkleşecek, ve Rusiye şübesiz ğalebe qazanacaq, çünki Rusiye yutturamaz. Menimce, olarnıñ sağlıqsız ğalebe isteginen bu vaziyetni pek açıq tarzda añlatqaları şu üç qanundır", — dep Ğörünöva qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
