Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) mekteplerinde balalar mayısnıñ 9-na, Rusiyede "Ğalebe künü" qayd etilgende, "vatan imayecileri" — Ukrayinağa qarşı cenkleşken Rusiye arbiyleri — içün levhalar azırlamalılar. Bu talap bazı ana-babalarnıñ narazılığını doğurdı. Mektepler yarı boş, balalar "hastalıq" ya da "aile vaziyetleri" sebebinden evde qalalar.
Mayısnıñ 7-nde "Sarı şerit" cemaat narazılıq areketi bu aqqında haber etti.
Faalcilerniñ malümatına köre, vaziyet o qadar kerginleşti ki, işğalli memuriyet sakinlerni qorquzğanına baqmadan, planlaştırılğan "vatanperverlik" tedbirlerinde iştirakniñ eksik olmasından qorqa.
Mayısnıñ 5-nde, Bazarertesi künü, federal telekanallarnıñ yayınını temin etmek içün, ana-babalarınıñ ruhsetini almadan, mektep talebelerini derslerden çıqaralar, sovet urbasına kiyindireler ve mayısnıñ 9-na bağışlanğan kelecek süjetler içün resim yapmağa mecbur eteler.
"Ocalar ve memurlar balalarğa ana-babalarına mektepte ne olğanını aytmamağa yasaq etkenleri qayd etildi", — dep faalciler qayd ettiler.
Hatırlatamız ki, Sevastopolda (Aqyarda) mayısnıñ 9-nda olacaq parad telükesizlik sebebinden lâğu etildi.
Bundan ğayrı, Sevastopol (Aqyar) mektep talebelerine, MDB memleketleri tışında aliy oquv yurtlarında tasil almağa saylağanlarını yazma şekilde añlatmağa mecbur eteler, dep "Sarı Şerit" areketi bildirdi.
Bundan da ğayrı, Milliy muqavemet merkezi, işğalciler Qırımdaki mektep talebelerini ve studentlerni mayısnıñ 9 kününe tedbirlerde iştirak etmege mecbur etkenini bildirgen edi. Hususan, 200-den çoq bala "Portal 45/25" forumına toplandı.
"200 bala "qaraman yolu"nı keçmege mecbur etildi. Tarih yerine — "qurtuluş Rusiyesi" aqqında agressiv teşviqat", — dep MMM qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
