Sevastopolnıñ (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adnıñ) işğalli akimiyeti telükesizlik sebebinden mayıs ayınıñ 9-nda, ruslar "Ğalebe künü"ni qayd etkende, paradnı lâğu etti.
Mayısnıñ 5-nde Sevastopol (Aqyar) "gubernatorı" Mihail Razvojayev bıno bildirdi, dep TASS haber etti.
"Bu sene Ğalebe paradı [Sevastopolda] olmaycaq, bu nazar noqtası [Rusiye] Mudafaa nazirliginen añlaşıldı", — dep o, şeerniñ işğalli ükümetinde "aparat toplaşuvı"nda qayd etti.
Hatırlatamız ki, Kreml yolbaşçısı Vladimir Putin mayısnıñ 9-nda Moskvada Ekinci cian cenkinde Ğalebe kününe bağışlanğan paradnı keçirmege planlaştıra. Kimni davet etkenini, kim red etkenini ve dünya toplulığınıñ buña nasıl cevap bergenini Suspilneniñ malümatında oquñız.
Daa evel Slovakiya baş naziri Robert Fitso Ukrayina prezidenti Volodımır Zelenskıynı mayısnıñ 9-nda Moskvanı ziyaret etecek devlet ve ükümet yolbaşçılarını qorquzmaq ıntıluvında qabaatladı.
Slovakiyadaki Ukrayina elçihanesi qayd etti ki, Zelenskıynı qabaatlamaq yerine, Slovak ortaqlarına "Ukrayina tarafı mayıs ayınıñ 9 künü Rusiye tarafından yapılğan provokatsiya ve telükesizlik bozuluvı içün qabaatlavnı Ukrayinağa yüklemege imkân bermey ve bu sebepten olarnıñ telükesizligini kefil etip olamay" degen Ukrayin lideriniñ beyanatlarını diqqatnen ögrenmege, yañıdan baqmağa ve talil etmege tevsiye ete.
Volodımır Zelenskıy mayısnıñ 9-nda Moskvada keçirilecek parad ve Rusiyege barışıq teklifleri aqqında ne dedi
Ukrayina prezidenti Volodımır Zelenskıy mayısnıñ 3-nde Ukrayina "Rusiye Federatsiyasınıñ toprağında olğanlardan mesüliyetli degil" dep bildirdi.
"Olar siziñ telükesizligiñizni temin eteler, ve bu sebepten bizler iç bir kefalet bermeycekmiz. Çünki Rusiyeniñ bu künlerde ne yapacağını bilmeymiz. O, çeşit adımlar yapa bilir: yanğın ve patlav ve ilâhre, soñra ise bizni qabaatlay bilir. Tış işler nazirine bunı aytqan edim, nazar noqtamız: (telükesizlik sebeplerinden — muar.) Rusiyege barmağa tevsiye etmeymiz", — dedi Zelenskıy.
Çiçek ayınıñ 28-nde Kreml yolbaşçısı Vladimir Putin mayısnıñ 8-nde saat 00:00-den mayısnıñ 11-nde saat 00:00-ge qadar devam etecek Ekinci cian cenkinde ğalebeniñ 80-inci yıllığını qayd etüv künleri "barışı" ve "cebe areketleriniñ toqtatıluvı" aqqında ilân etti.
Zelenskıy Putinniñ teklifine cevap berip, barışıqnı ilân etmek içün "mayısnıñ 8 kününi beklemege acet yoq", dep qayd etti. Ukrayina Tış işler nazirligi Rusiyeni eñ azından 30 künlik ateş toqtatmasına çağırdı.
Daa soñra o, üç kün cenkniñ bitüvinen bağlı nevbetteki planlarnı qurmaq içün yeterli olmağanını, şunıñ içün Ukrayina AQŞnıñ teklifinen er angi kün ateş toqtatılmasına azır olğanını ilâve etti.
Rusiye tış işler naziri Sergey Lavrov, Putinniñ mayısnıñ 8-11 künleri üç künlik barışıq teklifini, Ukrayinanen doğrudan-doğru muzakerelerniñ başlanğıçı, amma evelki şartlarsız, dep bildirdi. Lavrov şunı da qayd etti ki, Rusiye daa uzun müddetli barışıqnı ilân etmek ğayesine şübhenen yanaşa.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
