Yedi yılğa qanunsız sürette apiske alınğan İrına Danılovıç, Rusiyeniñ Stavropol ülkesindeki Zelenokumsk şeerinde mabüslerniñ ilâc almaq imkânlarından marum etilgenini bildirdi. Bu müstemlekede İrına apis cezasını çeke.
"Tribunal. Qırım epizodı" bu aqqında haber berdi.
"Memuriyet, ilâclarnıñ berilmesini sebepsiz red ete ya da müddetsiz toqtata bilecek qaidelerni kirsetti. Aynı zamanda, müessiseniñ tibbiy ve sanitar qısmında kerekli ilâclar yoq, ve uquq qorçalayıcılarnıñ fikirince, bazı ilâclar, suvnen suvlandırılğan. Bu sıñırlavlar, onıñ fikirince, siyasiy mabüsler sıq-sıq körgen ahlâqiy basqınıñ bir parçasıdır", — dep aytıla haberde.
Tibbiy yardım kösterilmemesi, sert bir davranış olaraq tanıla bile, dep "Tribunal. Qırım epizodı" yazdı. Roma nizamnamesiniñ 8-inci maddesine köre, bu arbiy cinayetlernen bağlıdır — bilerek ağır azap çeküv ya da ciddiy beden ya da sağlıq zararını ketirüv.
Hatırlatamız ki, İrına Danılovıç 2022 senesi çiçek ayınıñ 29-nda tutuldı. O, patlayıcı maddeler ya da patlayıcı aletlernen qanunsız areketlerde qabaatlanıp, apis cezasını çeke.
Saban ayında sağlığı fenalaşqanı ve yürek ağrısı aqqında bildirdi.
İrına Danılovıç aqqında ne bilemiz
Saban ayınıñ 29-ında vaqtınca işğal etilgen Qırımda işten evge qaytqanda İrına Danılovıç ğayıp oldı. Aynı kün Kefe yanında Oy Quyu köyündeki evi tintildi. Anda ana-babaları yaşağan ediler, evini tintkende işğal quvetçileri cep telefonı ve tehnikasını alıp çıqardılar.
Bir qaç ay devamında tibbiy yardım talap etken soñ saban ayınıñ 21-inde açlıq çekmege ilân etti — izolâtorda, ayrıca keçken sene üküm çıqarılğan soñ onıñ sağlığı pek zayıfladı.
Cinaiy davasınıñ bilgilerinen tanış olıp bitirmek içün qanunsız "Kefe şeer makemesi"ne ketkende Danılovıç bayıldı. Bundan ğayrı, azaplar sebebinden açlıq ilân eter.
Çiçek ayınıñ 6-sında jurnalist açlıq bitirdi, çünki onı teşkermek ve tedaviylemek içün onı Aqamescitteki SİZOdan hastahanege alıp ketirmege söz berdiler.
Bozarğan aynıñ 29-ında işğal etilgen Qırım Yuqarı makemesi içtimaiy jurnalist ve faalci İrına Danılovıçnıñ ükümini deñiştirdi. Bundan evel patlayıcı alet saqlağanı sebebinden yedi senege malüm etildi. Apellâtsiya makemesiniñ qararına köre ceza müddeti bir ayğa azladılar.
Keçken sene boş ayda bildirildi ki, Danılovıç sanitar olmağan şartlarda buluna ve ihtiyac duyğanına baqmadan onı tedaviylemeyler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
