Qırımdaki FSB işğalli hızmeti Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) sakinini Qırım köpründe ücüm etmege çağırğanında qabaatlap yaqaladı.
RİA "Novosti Krım" bunı bildirdi.
"O, "Telegram"da ava telükesi ilân etilgenine dair izaat berdi, dep İçki işler nazirligi bildirdi. Bundan da ğayrı, adam bir qaç esap yazısını yarattı, anda Moskvada uçucısız uçaq aletleriniñ ücümlerini aqladı, yarımadağa raketa ücümlerine çağırdı ve olarnı açıqtan destekledi", — dep haberde qayd etildi.
Hatırlatamız ki, Ukrayina prezidentiniñ Qırımdaki temsilciliginiñ malümatına köre, 2025 senesiniñ ilk altı ayı devamında işğal etilgen yarımadada "Rusiye ordusını itibardan tüşürüv" maddesine istinaden 1435 dava qayd etildi.
"1236 davasında para cezaları ya da davalarnı birleştirüv qararları çıqarıldı. 95 davasında davalar devam ete. Mahkeme qararlarınıñ 49%-i (607) qadınlarnen bağlı, 51%-i (628) ise erkeklernen bağlı", — dep QMM yazdı.
Daa evel Avropa insan aqları mahkemesi Rusiyeni söz serbestliginiñ sistematik basqısı ve Ukrayinağa qarşı cenkni tenqit etkeni içün insanlarnıñ taqip etilmesinde qabaatlı tanıdı. Avropa insan aqları mahkemesi ayrı qayd etti ki, Qırımdaki işğalli mahkemelerniñ bütün "qararları" qanunsızdır.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız