Avropa insan aqları makemesi Rusiyeni söz serbestligine sistematik basqı yapmasında ve Ukrainağa qarşı cenkni tenqit etkeni içün insanlarnıñ taqip etilmesinde qabaatlı tanıdı. Makeme ayrıca qayd etti ki, Qırımdaki işğalli makemelerniñ bütün "qararları" qanunsızdır.
Ukraina Adalet nazirligi bunı bildirdi.
Avropa insan aqları makemesi "Novaya gazeta ve başqaları Rusiyege qarşı" davasında müim bir qarar aldı, bu qarar 161 arizanı birleştirdi, olarnıñ arasında üç Ukraina vatandaşı da bar edi. Makeme bir ağızdan tanıdı ki, Rusiye Ukrainağa qarşı cenkte tenqitni bastırmaq içün "arbiyni itibardan tüşürüv" ve "sahte haberler" qanunlarını qullanıp, söz serbestligini bozdı.
"Davamızda, Rusiyeniñ Ukrainağa qarşı cenk ve tecavuzına qarşı öz nazar noqtasını bildirgen şahıslar, Rusiye tarafından "Rusiye ordusını itibardan tüşürüvi" olaraq qabul etilgen beyanatları içün daima taqip ve bedeniy zorbalıqqa oğratılğanı sebebinden, vaziyet Rusiyeniñ tolu miqyaslı istilâsından soñ bayağı beterleşkenini qayd ettik", — dep Avropa insan aqları makemesiniñ vekâletlisi Marğarıta Sokorenko qayd etti.
Avropa makemesi vaqtınca işğal etilgen Qırımdaki vaziyetke ayrı diqqat ayırdı. Makeme qayd etti ki, Qırım "makemeleri"niñ bütün "qararları" qanunsızdır, yarımadada Rusiye qanunlarınıñ qullanılması ise İnsan aqları şartnamesini boza.
Telegram, WhatsApp ve Facebookta Suspilne Qırım haberlerine abune oluñız