Çiçek ayınıñ 21-nci sabası Rusiye bir gemisini — umumen altı "Kalibr" qanatlı raketasınıñ taşıyıcısı olğan gemisini Qara deñizge arbiy hızmetke yolladı. Azaq deñizde ise Rusiye gemileri qayd etilmedi.
Ukrayina SQniñ Arbiy-deñiz quvetleriniñ matbuat hızmeti Facebookta bunı bildirdi.
Aynı zamanda Aq deñizde ise eki Rusiye gemisi bar, olar umumen 12 "Kalibr" qanatlı raketasınıñ taşıyıcısıdır.
Bundan ğayrı, keçken künü Rusiye Federatsiyasınıñ menfaatları içün Keriç boğazından Azaq deñizine altı gemi keçti, olardan üçü İstanbul boğazına areket etti. Keriç boğazından Qara deñizge ise bir gemi keçip, İstanbul boğazına areket etti.
"Rusiye, avtomatik identifikatsiya sistemasını (AIS) söndürerek, 1974 senesiniñ Deñizde insan ayatınıñ qoruvı aqqında halqara şartnamesini (SOLAS) bozmağa devam ete", — dep qayd etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız