Rusiyenen çiçek aynıñ 8 Rusiye vatandaşı ve amerikalısınen beraber kâinatqa yollanğan Zaporijjâ vilâyetiniñ sakini Aleksey Zubrıtskiy devlet hainliginde qabaatlanıla. Ukraina Silâlı Quvetleriniñ leytenantı Qırımda yerleşken arbiy bölüklerniñ birinde aviatsiya bölüginiñ uçucısı olaraq hızmet etken edi. 2014 senesi yarımadanıñ işğali vaqtında Rusiye tarafına keçti.
Bu aqta "Sistema" - "Nastoyaşçeye vremâ" telekanalınıñ ("Amerika sesi" iştiraginen "Azatlıq Radiosı" tarafından yaratılğan) ve "Azatlıq Radiosı" rusiye hızmetiniñ araştırma leyhası teşkerüvinde bildirile.
RF, Qırımnı zapt etmege başlağanda, komandanlıq Zubrıtskıynı Ukraina qıtaiy qısmındaki başqa bir yerine yollağan ve onıñ kelmesi içün soñki müddetni belgiledi – 2014 senesi mayısnıñ 12-ne qadar. Lâkin o, hızmetke qaytmağan.
2025 senesi saban aynıñ 11-de Vinnitsa şeer makemesi, erkekni satqınlıq yapqanına köre 15 yılğa ğıyabiy tarzda mahküm etti.
"22.03.2014-den 13.05.2014-ne qadar devir içinde Sevastopolde (Aqyar) bulunaraq, şahsiy sebeplerden areket etip, duşman tarafına keçken, böyleliknen satqınlıq yaptı, yani suverenitet, iqtisadiy, mudafaa, territorial bütünligi, Ukrainanıñ malümat havfsızlığınıñ zararına areketler yapqan", – denile makemeniñ qararında.
Anda qoştılar ki, qabaatlanğan adam 10 yıldan ziyade Rusiye ordusınıñ sırasında, şu cümleden, büyük miqyaslı cenk vaqtında hızmet etken.
2018 senesi onı kâinatlar otrâdına yazdılar. Tedqiqatçı jurnalistler qayd etkenleri kibi, Zubrıtskiy, tarihta satqınlıqta qabaatlanğan birinci kâinatçı oldı.
Telegram, WhatsApp ve Facebookta Suspilne Qırım haberlerine abune oluñız
