Rusiye, sekiz yıllıq apis cezasından soñ azat etilecek olğan Ukrayin siyasiy mabüsi Ğennadiy Lımeşkoğa qarşı yañı qabaatlavlarnı bildire bilir. Onıñ bulunğan yeri şimdilik belli degil. Lımeşko, köçip kelgenler içün merkezge avuştırılğan soñ, onen bağ yoq oldı.
Suspilne Qırım içün vaziyetni "Kremlniñ siyasiy mabüsleriniñ tuvğanları birleşmesi"niñ reisi İhor Kotelânets izaatladı.
Apis müddeti bitken soñ Lımeşko çetel vatandaşları içün merkezge yerleştirildi. Anda, Kotelânetsniñ aytqanına köre, Ukrayinler deşetli şaraitte bulunalar ve qanunğa köre 90 künden ziyade tutulalar.
"Bu bölükler — yataqhaneler, şifahane degil, olar da azatlıq sıñırlanğan müessiseler, andan çıqmaq mümkün degil, serbest insan olmaq mümkün degil", — dep birleşme reisi qayd etti.
Onıñ aytqanına köre, Rusiye akimiyeti Lımeşkoğa qarşı yañı "aşırıcılıq davasını" açtı.
"Men bellesem, onı Rusiyege qarşı ya da Ukrayinağa qoltutqan laflar yapmağa qandırğan ediler. Rusiyede Rusiye mefküresine zıt kelgen sözler içün aşırıcılıq içün apishanege kirmek pek qolay", — dep Kotelânets qayd etti.
Onıñ aytqanına köre, Ğennadiy tutulğan soñ soy-soplarınen qısqa müddet devamında bağ tuta edi, amma soñra bağ kesildi. Berilgen malümatqa köre, onı Pâtigorsktaki tahqiqat izolâtorına alıp ketkenler. Rusiye siyasiy mabüslerni, hususan erkeklerni, Ukrayinağa yibermege istemey, çünki olarnı askerlikke çağırmaq telükesi bar.
"Olar bu insan Ukrayinağa qaytıp, cemaat ya da siyasiy faaliyetnen oğraşacağını añlaylar. Onıñ içün oña repressiya tertibatında qalmağa, izolâtsiyağa çekilmege ya da apishanege qaytmağa daa yahşı kele. Rusiye akimiyeti bir kere qırılğanlardan bile qorqa", — dep Kotelânets añlattı.
Bundan da ğayrı, o, Ğennadiy müstemlekede işkencege oğrağan soñ sağlıq vaziyeti fena olğanını bildirdi, lâkin şimdilik onıñ alı aqqında malümat yoq. Qoranta advokatnı qıdıra, lâkin zemaneviy şaraitte Rusiyede Ukrayin içün imayeci tapmaq pek qıyın.
Şimdilik Ukrayina ombudsmanınıñ ofisi Rusiye tarafına muracaat etip, Lımeşkonıñ bulunğan yeri ve tutuluv şaraitini ögrenmege rica etti.
Ğennadiy Lımeşko kimdir
Lımeşko 1992 senesi ilk qış ayınıñ 29-nda doğdı. Harkiv milliy köy hocalığı tehnik universitetini bitirdi. 2015 senesinden 2017 senesine qadar ilk evelâ göñülli batalyonda, soñra ise Ukraina Silâlı quvetleri erkânında kontrakt boyunca hızmet etti.
2017 senesi arman ayınıñ 12-nde Rusiye FSBsi işğal etilgen Qırımdaki Sudaqta "UHH agenti" dep adlandırılğan ve yarımadanıñ astyapı ve yaşayış obyektlerine qarşı diversiya azırlağanında qabaatlanğan adamnıñ tutulğanını bildirdi.
Lımeşko "patlayıcı maddeler ve silâ qanunsız satın aluv, taşuv ve saqlav"da qabaatlandı. İşğalli mahkeme Qırımnıñ işğali sebebinden "siyasiy duşmanlıq" sebebini ağırlaştıra, onıñ içün o diversiya yapmağa razı oldı.
Ukrayin öz qabaatını tanıdı ve davağa qoşulmağan tahqiqatnen resmiy olmağan añlaşma tizdiler. İşğalli mahkeme onı sekiz yılğa mahküm etti, yaş qızı içün ükümini yarım yılğa qısqarttı. Lımeşkonıñ qorantası tüşüne ki, o, FSB basqısı ve işkencege oğratılğanında Qırımdaki diversiyalarnı azırlağanı aqqında şaatlıq etti. Advokatı, üküm "cinayet ağırlığına uymağanı"nı ayttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
