Büyük Britaniyadaki mahkeme sabıq işğalli Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) gubernatorı Dmitriy Ovsânnikovnı, apayından 76 biñ funt sterling (95,5 biñ dollar) ve qardaşından yañı Mercedes alğan soñ, sanktsiyanı bozğanında ve para yuvğanında qabaatladı. O, Britaniya tarafından Rusiyege qarşı kirsetilgen sanktsiyalarnı bozğanı içün mahküm etilgen birinci kişi oldı.
Çiçek ayınıñ 9-nda Milliy cinayetler agentligi (NCA) bu aqqında haber etti.
Onıñ qardaşı Aleksey Ovsânnikov da sanktsiyalarnı bozıp, iqtisadiy resurslarnı Dmitriyge bergeni sebebinden mahküm etildi, dep qoştılar.
Mahküm etilgen adam 2016 senesinden 2019 senesine qadar işğal etilgen Sevastopolnıñ (Aqyarnıñ) "gubernatorı" vazifesini becere edi. Adam Avropa Birligi tarafından sanktsiyalarğa oğradı, Büyük Britaniya ondan çıqqan soñ, memleket ayrıca da Rusiyege qarşı 2019 senesi maliyeviy sıñırlavlarnı kirsetti.
2023 senesi qara qış ayında Ovsânnikov Britaniya pasportını aldı, ve kelecek ayda o, apayı ve eki balasına Britaniyada qoşuldı.
O vaqıt Rusiyeli, Büyük Britaniya tış işler ve inkişaf nazirligine muracaat etip, sanktsiyalar statusını lâğu etmege rica etti. Bundan da ğayrı, apayına 76 biñ funt sterlingni ayırğan bank esabını açtı, bu esabına Mercedes Benz GLC 300 SUVına para qoşmağa imkân berdi. Bank, onıñ sanktsiyalar altında olğanını bilgen soñ, esapnı buzlattı.
Mahküm etilgen adam para depozitini qaytarıp berdi, ondan soñ qardaşı onıñ yerine Mercedes aldı ve onı sigortaladı, böylece Dmıtro bu maşnanı aydap oldı.
"Dmitriy Ovsânnikov ve onıñ qardaşı onıñ bu sanktsiyalarğa oğrağanını añlay ediler ve nezaretni keçirmek içün areketler yaptılar. Bu qararlar tek muayyen şahıslarnıñ közümizde olğanını degil de, qaidelerniñ bozuluvına yardım etkenlerniñ olğanını köstere", — dep NCA baş müdiri Grem Biggar ayttı.
Qıral prokurorlıq hızmetiniñ bölüginiñ baş prokurorı Yulius Kaponnıñ qayd etkenine köre, sanktsiyalar Rusiyege arbiy areketlerni toqtatmaq içün kirsetildi, çünki Britaniyalılar "akimiyet olarnıñ halqara biznes munasebetleriniñ normal alıp barılmasına keder etecegi"ni bekleyler.
"Putinge, onıñ tarafdarlarına ve Ukrainada onıñ barbarlıq cenkine yardım etken er keske qarşı basqını quvetleştirmege azırmız", — dep FCDO sanktsiyalar naziri Stiven Doti qayd etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
