Qırımnıñ medeniy miras obyektleriniñ 44%-i restavratsiyağa muhtac. Yarımadanıñ işğalli akimiyeti "medeniy miras obyektleriniñ devlet cedveli"ne kirsetken 2 409 abideden 1 070-i bu.
TASS agentligi Rusiye kontrolindeki "Qırım medeniyet nazirligi"ne atfı etip bunı bildirdi.
"Bugünki künde 2 409 obyekt medeniy miras obyektleriniñ yekâne devlet reyestrine kirsetildi. Bütün obyektler içün tehnikiy vaziyet vesiqaları azırlanıldı, olarğa binaen 1070 obyektke eñ yaqın beş yıllıq tsikl boyunca saqlav işleri yapılacaq, bu ise, medeniy miras obyektleriniñ 44% teşkil ete", - — dep aytıla haberde.
Hatırlatamız ki, saban ayında işğalciler Bağçasaraydaki Hansaraydaki qadimiy freskanı yoq etkenleri belli oldı. İşni alıp barğan qurucılar, bu eski plastinkası olğanını tüşüne ve örtüvni alıp taşlay, dep Qırım reintegratsiyası birligi bildirdi.
Bundan da ğayrı, ruslar "Hersones qadimiy şeeri ve onıñ Horası" dünya mirası obyektiniñ toprağında arbiy inşaatlarnı quralar, dep saban ayınıñ 31-nde matbuat konferentsiyası vaqtında Adam Mitskevıç universitetiniñ professorı Olena Klenina bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
