Rusiyeniñ Don şeer makemesi Qırım siyasiy mabüsi Server Zekiryayevniñ apishanege şikâyetini baqmağa başladı. Apiske alınğan adam Tula vilâyetindeki 1-nci apishanede tutula.
"Qırım birdemligi"ne mabüsniñ ömür arqadaşı Zarema Zekiryayeva bunı bildirdi.
Onıñ aytqanına köre, dava kameralardaki şaraitnen bağlı. Kanalizatsiya sistemasından çıqqan gazlar sebebinden mabüs kerginlik ve oksigen qıtlığından zarar köre.
Bundan da ğayrı, memuriy dava onıñ adı "qaçmağa azır olğan" mabüsler cedveline kirsetilgenini iddia ete.
"Siyasiy mabüsniñ sağlığı fenalaşa. O, aştan soñ qusa, boğazı qızarıp, başı daima aylanıp tura. Zekiryayevniñ şikâyetlerine müstemleke memuriyeti cevap bermey. Qırımtatarnı bir kameradan başqa yerge avuştırmağa da bir qaç kere red etken ediler. Hadimler onı tek bir kere "yaşayış tarzı içün" yollağanlarını añlattılar ve muntazam olaraq oña "terrorist" deyler, dep aytıla haberde.
Keçken sene saban ve arman aylarında Server Zekiryayev Tula vilâyetiniñ 1-nci apishanesinde işkence adiseleri aqqında bildirgen edi. O vaqıt Zarema Zekiryayeva prokurorlıqtan aqayınıñ tutuluv şartı "qabul etilgen" olğanına dair cevap aldı.
Server Zekiryayev aqqında ne bilemiz
Tevqif etilmegen evel Zekiryayev beden tasili ocası olıp çalışqan ve çiçekçilik yapqan edi. Onıñ 13 balası bar, adam tevqif etilgen soñ soñki balası doğdı. Siyasiy mabüsniñ saqatlı qızı bar, onıñ doğuvdan san çıkığı bar.
2017 senesi ekim ayınıñ 11-inde Bağçasarayda FSB işçileri altı qırımtatar adamını tuttılar: Server Zekiryayev, Tımur İbrahimov, Marlen (Süleyman) Asanov, Memet Belâl, Seyran Saliyev ve Ernes Ametov.
2018 senesi mayıs ayınıñ 21-inde bu cinaiy dava çerççivesinde Edem Smayilov ve Server Mustafayev tevqif etildi. Er kes Rusiyede terrorcı bir teşkilât olaraq tanınğan, amma dünyanıñ ülkeleriniñ çoqusında ve Ukrainada serbest şekilde faal etken Hizb ut-Tahrir islâm siyasiy fırqasınıñ faaliyetine ait olmaqta şübelendi.
2020 senesi berim ayınıñ 16-sında Rostov-na-Donudaki Cenübiy bölge arbiy makemesinde "Hizb ut-Tahrir davası"nıñ ekinci Bağçasaray gruppasını üküm ettiler. Qırımtatarlarnı 13-19 senege maküm ettiler.
2019 senesi oraq ayınıñ 18-inde Avropa parlamenti bir rezolütsiya çıqardı. Anda Rusiyeni bütün ukrain siyasiy mabüslerini, ve ekinci Bağçasaray gruppasınıñ iştirakçilerini azat etmege çağırdı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
