Arman ayınıñ 26. künü Rostov-na-Donudaki Cenübiy bölge arbiy makemesi, "Hizb ut-Tahrir davası"nıñ beşinci Bağçasaray gruppasınıñ davasını baqmağa başladı. Senede ilk kere qırımtatar faalcileri, ailelerinen körüştiler.
Siyasiy mabüslerniñ tuvğanları "Qırım birdemligi" cemaat teşkilâtına bunı bildirdiler.
Böylece, davanıñ mabüsi Seidamet Mustafayevniñ anası Esma Seydametova, apiske alınğanlarnıñ tuvğanlarına bir sene devamında Aqmescitniñ 2. SİZOda tuvğanlarını körmege izin bermey ediler, dep añlattı. Yalıñız Eldar Yakubovnıñ apayı Ayşe, 8 ay beklegen soñ ve UFSBniñ hususan müim işler boyunca taqiqatçısı Vitaliy Vlasovnıñ bir qaç rednamesinden soñ onı qısqa müddetke kördi.
"Bizni kerçekten körmediler. Oğlanlarımıznı körgenimiz pek hoş oldı. Olar pek yahşı körüneler, er keske selâm berdiler ve öz meslelerinen yalıñız olmağanları ve kimse çette qalmağanını añlatqan cemaatnı körmege pek quvandılar", — dep Mustafayevniñ anası qayd etti.
Advokat Edem Semedlâyev qayd etti ki, oturışta prokuror qabaatlayıcı qararnı eki saatqa yaqın oqudı. Makemeci oña çıqışını qısqartmağa rica etti, amma o, vesiqanı tolusınen seslendirdi.
Makeme oturışında dava mabüsleri özlerini qabaatlı tanımağanlarını ve qayd etilgen cinayetlerni yapmağanlarını bildirdiler. Oturış arman ayınıñ 12-nde keçirilecek edi, amma o vaqıt dava iştirakçilerinden biri — Remzi Nemetulayev Rostov-na-Donudaki 1. SİZOdan makemege ketirilmedi. Sebebini aytmadılar.
Hatırlatamız ki, bu yaz işğal etilgen Qırımdaki Aqmescit SİZOdan beşinci Bağçasaray gruppasınıñ bütün mabüsleri Rusiye Federatsiyasınıñ Rostov-na-Donu şeerindeki taqiqat izolâtorına etap etildiler.
"Hizb ut-Tahrir davası"nıñ beşinci Bağçasaray gruppası aqqında ne bilemiz
2023 senesi arman ayınıñ 24-ünde rus quvetçileri, qırımtatar Ruslan Asanov, Seydamet Mustafayev, Remzi Nemetulayev, Abdulmecit Seitumerov, Amethan Umerov ve Eldar Yakubovnıñ evlerini tinteler.
Beş adam, cemaat faalcileri ve çoq balalı babalardır. Keçenlerde Seitumerovnıñ balası doğdı. Abdulmecit, 2020 senesi saban ayında teqif etilgen, 17 ve 14 senege maküm etilgen Bağçasaraydan süyasiy mabüsler olğan Osman ve Seitumer Seitumerovnıñ doğmuş qardaşıdır.
Terrorcılıqta qabaatlanıp tevqif etilgen başqa qırımtatarlarnı destek etici numayışlarda bütün altı Bağçasaray faalcisini bir qaç kere tuttılar.
Nimetulayev ve Mustafayevni bir qaç künge tevqif ettiler. İşğalciler, "vatandaşlarnıñ kütleviy bulunmalarınen içtimaiy nizamnı bozğanı içün" Yakubovğa 10 biñ rublelik para cezasını berdiler. Umerov ise mahsus tutun müessisesinde bir qaç kün keçirdi ve "FV ya da telükesi vaqtında qaidelerni riayet etmeme aqqında" aynı maddege mücibi para cezasını ödedi.
2023 senesi berim ayında "UFSBniñ ayrıca müim meseleler üyken taqiqatçıcı" Vitaliy Vlasov Yakubovğa ve davanıñ başqa iştirakçisiniñ apayı Feride Halilovağa aqaylarınen körüşmege izin bermedi. Beşinci Bağçasaray gruppasınıñ iştirakçileriniñ apayları aynı rednamelerni aldılar.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram ve Facebookta Suspilne Qırım haberlerine abune oluñız
