Ukraina prezidenti Volodımır Zelenskıy saban ayınıñ 25-nde 103 yerli umumiy makemeniñ adını deñiştirüv qanun leyhasını imzaladı. Bu işğal etilgen Qırımda yerleşken altı makemege de ait.
Ukraina prezidentiniñ Qırım Muhtar Cumhuriyetindeki temsilciligi bunı bildirdi.
Yarımadada aşağıdaki makemelerniñ adları aqqında söz yürsetile:
- Qırım Muhtar Cumhuriyetiniñ Kirov rayon makemesini Qırım Muhtar Cumhuriyetiniñ İslâm Terek rayon makemesine;
- Qırım Muhtar Cumhuriyetiniñ Krasnogvardiyskıy rayon makemesini Qırım Muhtar Cumhuriyetiniñ Qurman rayon makemesine;
- Qırım Muhtar Cumhuriyetiniñ Krasnoperekopsk şeer makemesini Qırım Muhtar Cumhuriyetiniñ Perekov şeer makemesine;
- Qırım Muhtar Cumhuriyetiniñ Lenin rayon makemesini Qırım Muhtar Cumhuriyetiniñ Yedi Quyu rayon makemesine;
- Qırım Muhtar Cumhuriyetiniñ Pervomayskıy rayon makemesini Qırım Muhtar Cumhuriyetiniñ Curçı rayon makemesine;
- Qırım Muhtar Cumhuriyetiniñ Sovet rayon makemesi Qırım Muhtar Cumhuriyetiniñ İçki rayon makemesine;
"Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad — terciman) aqqında aytsaq, onıñ rayonlarınıñ adlarınıñ dekommunizatsiyası qanun seviyesinde yapılmadı, onıñ içün şimdiki adlar deñişmey qala", — dep temsilcilik qayd etti.
Qanun resmen derc etilgen kününden itibaren 30 kün içinde küçüni ala.
Hatırlatamız ki, 2025 senesi qara qış ayında Nazirler şurası işğal etilgen Qırımda 22 coğrafiy obyektniñ adını deñiştirmege qarar aldı, olarnıñ çoqusına tarihiy qırımtatar adlarını qaytardı.
Telegram, WhatsApp ve Facebookta Suspilne Qırım haberlerine abune oluñız
