Ukraina Nazirler Kabineti işğal etilgen Qırımnıñ 22 coğrafik obyektiniñ adlarını deñiştirmege razı oldı, olarnıñ çoqusına tarihiy qırımtatar adları qaytarıldı. Adnı deñiştirüv işinde Ukraina milliy hatıra institutı ve Qırımtatar Milliy Meclisi faal iştirak ettiler.
Ukraina prezidentiniñ Qırım Muhtar Cumhuriyetindeki temsilciliginiñ matbuat hızmeti bunı bildirdi.
Qayd etilgenine köre, adlarnı deñiştirüv "Ukrainada Rusiye imperator siyasetiniñ teşviqatını takbih ve yasaq etüv ve toponimiyanıñ dekolonizatsiyası" Ukraina qanunı çerçivesinde yapıldı. Umumen bu qararnen Ukrainanıñ bütün toprağında yüzden çoq coğrafik obyektniñ adı deñiştirildi.
Qırımda adları deñiştirilgen yerlerniñ tolu cedveli:
Avrorivka ayırığı Başbek ayırığına;
Artemivka yılğası Toqa yılğasına;
Bagrationove ayırığı Qoñrat ayırığına;
Vorontsivka özeni Küçük Çatırlıq özenine;
Kirovske demiryol stantsiyası İslâm Terek demiryol stantsiyasına;
Krasnogvardiysk kanalı Qurman kanalına, onıñ Krasnogvardiysk bölügi Qurman bölügine;
Krasnopatizansk demiryol stantsiyası Boranğar demiryol stantsiyasına;
Krasnoperekopsk demiryol stantsiyası Yañı Qapu demiryol stantsiyasına;
Krasnoflotske demiryol stantsiyası İçki demiryol stantsiyasına;
Krasnoflotske ayırığı Qaynaş ayırığına;
Kutuzov çeşmesi Süngü Suvğa;
Lazo ayırığı Qırmaçı ayırığına;
Lomonosove ayırığı Bay Kögenli ayırığına;
Peredove ayırığı Tüp Tarhan ayırığına;
Polüşkine ayırığı Burçı ayırığına;
Polüşkine yılğası Burçı yılğasına;
Pravdıne ayırığı Aq Taş ayırığına;
Pyatıriçka ayırığı Kopiyka ayırığına;
Suvorov emeni "Dört qardaşlar" emenine;
Çervonıy kamin Qızıl Taşqa;
Çkalove ayırığı Büyük Qarcav ayırığına.
"Kolonizatsiyasızlaştıruv, şu cümleden toponimikanıñ kolonizatsiyasızlaştıruvı, Ukrainanıñ hatıra siyasetiniñ müim bir qısmı ola, Qırımğa tarihiy adlarnıñ qaytarılması ise Ukrainanıñ tamır halqlarınıñ aqlarını temin etüvnen doğrudan bağlıdır", — dep prezidentniñ temsilciligi qayd etti.
Telegram, WhatsApp ve Facebookta Suspilne Qırım haberlerine abune oluñız
