Eki afta içinde Ukrainanıñ vaqtınca işğal etilgen topraqlarında, hususan Qırımda, işğalciler eñ azından on bir insannı tuttılar ve altı qanunsız üküm çıqardılar.
Bunı "Qırımtatar maaliy merkezi" bildirdi.
Merkezniñ malümatına köre, tutulğanlar 2025 senesi saban ayınıñ 7-nden 21-ne qadar aşağıdaki sebeplerden apiske alındı:
- Ukraina tarafdarı ifadeleri ve vatanperver timsaller — 4 şahıs.
- Devlet hainligi — 3 şahıs.
- Ukraina mahsus hızmetlerinen işbirligi — 2 şahıs.
- Diversiya azırlığı — 1 şahıs.
- Noman Çelebicihan adına qırımtatar batalyonında iştirak etüv — 1 şahıs.
İşğal etilgen topraqlarda müstemlekede 3,5 yıldan 24 yılğa qadar apis cezası berile. İşğalciler daa altı dava açtılar, şu cümleden UHH ile işbirlik, diversiya azırlavı, Noman Çelebicihan batalyonında iştirak etüv ve Ukrainağa qoltutqan sözlernen bağlı qabaatlavlar.
"Rusiye işğalcileri, Ukrainanıñ işğal etilgen topraqlarınıñ sakinlerini — hususan, Ukraina tarafdarı olğanları içün, içtimaiy ağlarda paylaşqanları içün ve atta adiy tefsirleri içün taqip etmege devam eteler. Hususan, mabüslerniñ adlarınıñ gizli tutulması, olarnıñ qorçalavını ve uquqiy yardımını qıyınlaştıra. Bu, işğalli rejimge qarşılıq köstergen er angi insanlarnı yoq etmek içün yapılğan repressiya siyasetini köstere", — dep QMM bildirdi.
Hatırlatamız ki, "QırımSOS" 2024 senesi Qırımda beş türlü insan aqları bozuluvını qayd etti: vatandaşlarnıñ urulması, tibbiy yardımğa muhtac olmav, mecburiy psihiatrik ekspertizalar, qanunsız apiske alınğanlarğa küç qullanuv ve ceza izolâtorına yerleştirüv.
Bundan da ğayrı, Qırım Muhtar Cumhuriyetindeki prezident temsilciliginiñ malümatına köre, Rusiye işğaliniñ 11 yılı devamında Qırımda eñ azından 28 qadın cinaiy taqipke oğradı. İşğalciler tarafından qanunsız açılğan memuriy davalarnıñ aman-aman yarısı qadınlarğa qarşı açılğan.
Telegram, WhatsApp ve Facebookta Suspilne Qırım haberlerine abune oluñız
