Saban ayınıñ 19-nda telefon subetinde Volodımır Zelenskıy ve Donald Trump Qırım meselesini kötermediler. Hususan, matbuat vastalarında peyda olğan haberlerge köre, AQŞ prezidentiniñ memuriyeti yarımadanı Rusiyege ait dep tanımaq imkânını baqa.
Ukraina prezidenti Norvegiya baş naziri Yonas Gar Störe ile matbuat konferentsiyası vaqtında bunı ayttı.
Zelenskıynıñ aytqanına köre, o, Trump ile keçken sene New Yorkta laf etken edi.
"Onı, ukrainlerniñ Qırımnı ne içün bu qadar sevgenleri meraqlandıra edi, çünki ukrainler Qırımnı pek sevgenlerini eşitken edi. Men oña bu unikal tabiat, bu bizim ayırılmaz qısmımız, bu bizim ukrain yarımadamız olğanını ayttım", — dedi Zelenskıy.
Ukraina prezidentiniñ aytqanına köre, ukrainler olmadan Qırım öle.
"Qırım öle, çünki bütün logistika esas Ukrainanen bağlı. Suv, logistika. Eñ esası, turizm içün ne? Er kes sizge "turistler" deycek. Qırımda turizm yoq. Qırımğa 11 yıldır kimse kelmey. Qırımğa yazda 3 million turist kele edi. 2 million 800 ukrainalı. Bu cevap: Siz ne isteseñiz yapa bilesiñiz, beş yıldızlı musafirhaneler, çeşit binalar, amma o yerge millionlarnen turistni alıp ketemezsiñiz", — dedi prezident.
Hatırlatamız ki, saban ayınıñ 17-nde Semafor gazetası, AQŞ prezidenti Donald Trumpnıñ memuriyeti, cenkniñ toqtatıluvı aqqında añlaşma çerçivesinde işğal etilgen Qırımnı Rusiye toprağı olaraq tanımaq imkânını baqa, dep bildirdi. Jurnalistler eki yüksek memurğa atıfta bulundılar.
Saban ayınıñ 19-nda Finlândiya prezidentinen keçirilgen matbuat konferentsiyasında Zelenskıy, Ukraina vaqtınca işğal etilgen topraqlarnı Rusiye tarafından tanınmasına razı olmaycağını ayttı.
Telegram, WhatsApp ve Facebookta Suspilne Qırım haberlerine abune oluñız
