Ukraina, vaqtınca işğal etilgen topraqlarını Rusiye tanımağa razı olmaycaq. Er angi muzakereler — cenkni toqtatmaq içün hususan, Rusiye içün, pek zayıf bir imkândır, olar alâ daa cenkni toqtatmağa azır olmağanını köstere.
Saban ayınıñ 19-nda Helsinki şeerinde Finlândiya prezidenti Aleksandr Stubb ile keçirilgen matbuat konferentsiyası vaqtında Ukraina prezidenti Volodımır Zelenskıy bunı bildirdi.
Volodımır Zelenskıynıñ fikirince, böyle muzakerelerniñ ilk adımı ateş toqtatılması olacaq, atta bundan evel tek kök ve deñizde tınçlıq yolundan keçmek kerek olsa bile.
"Cenkni adaletli barışıqnen bitirmege istesek, bu doğru adım olur. Soñra başqa meselelerge keçemiz, olarnıñ arasında, eminim, topraq meseleleri de olacaq. Bizim içün qırmızı sızıq — Ukrainanıñ vaqtınca işğal etilgen topraqlarınıñ Rusiye tanılmasıdır. Biz buña razı olmaycaqmız", — dep Zelenskıy qayd etti.
Matbuat konferentsiyası vaqtında prezident saban ayınıñ 19-nda AQŞ prezidenti Donald Tramp ile subetleşecegini bildirdi.
Hatırlatamız ki, saban ayınıñ 17-nde Semafor neşiri, AQŞ prezidenti Donald Trampnıñ memuriyeti işğal etilgen Qırımnı Rusiye toprağı olaraq tanımaq imkânını muzakere ete, dep bildirdi. Jurnalistler eki yüksek memurğa atıfta bulundılar.
Telegram, WhatsApp ve Facebookta Suspilne Qırım haberlerine abune oluñız
