Kıyiv vilâyetinde saban ayınıñ 19-nda Ukraina Silâlı quvetleriniñ serjantı "Rif"niñ cenazesi olıp keçecek. O, 2022 senesi çiçek ayında Donetsk vilâyetinde rusiye işğalcileri tarafından elâk oldı.
Bunı öz Facebook saifesinde Qırımtatar Milliy Meclisiniñ reisi Refat Çubarov bildirdi.
Onıñ aytqanına köre, Qırım Rusiye ordusı tarafından işğal etilgen soñ, serjant "Rif" 2015 senesi Ukraina Silâlı quvetlerine göñülli olaraq qoşuldı ve 2021 senesi bozarğan ayğa qadar Ukrainanı qorçalamaq içün arbiy areketlerde iştirak etti.
"Rusiye ordusı tarafından 2022 senesi kiçik ayda yapılğan büyük istilâdan soñ, Rusiye işğalcileri tarafından tutuldı, sert şekilde işkencege oğratıldı ve 2022 senesi çiçek ayında öldürildi. Bütün bu yıllar devamında serjant Rifniñ apayı aqayınıñ cesedini alıp, musulman adetlerine köre defn etmege tırışqan edi", — dep Refat Çubarov tarif etti.
Cenaze saat 13:00 Çayki köyü, Ğruşevskoğo soqağı, 3 adresinde ötkerilecek.
Telegram, WhatsApp ve Facebookta Suspilne Qırım haberlerine abune oluñız
