İşğal etilgen Qırımda "devlet hainligi"nde (RF Ceza qanunnamesiniñ 275-inci maddesi) şübeli sayılğan Keriçniñ 29 yaşında sakini tutuldı. İşğalciler onıñ "Ukraina mahsus hızmetlerine raketa ücümlerinde qullanmaq içün kritik astyapı obyektleri aqqında malümat bergenini" iddia eteler.
Bunı Qırım ve Sevastopol (Aqyar) boyunca Rusiye FSBsiniñ işğalli idaresi bildirdi, dep "Millet" işğalli teşviqat telekanalı haber etti.
"Yaqalanğan kişi Ukraina Mudafaa nazirliginiñ Baş istihbarat idaresiniñ hadiminen şahsiy bağ qurdı ve müdirniñ vazifesine köre, bölgeniñ kritik astyapı obyektleriniñ vaziyeti aqqında malümat topladı ve duşmanğa berdi. Malümat, raketa ücümlerinde qullanılması içün duşmanğa berilgen edi", — dep işğalli mahsus hızmet yazdı.
Ukraina mahsus hızmetleri bu yaqalanuv aqqında izaat bermedi.
Daa evel Ukraina prezidentiniñ Qırım Muhtar Cumhuriyetindeki temsilciligi, işğal etilgen Qırımda tolu miqyaslı istilâ başlağan soñ Qırım sakinlerine qarşı "Rusiye ordusını itibardan tüşürgen" 1242 "dava" açılğanını bildirdi.
2024 senesiniñ malümatına köre, işğal etilgen Qırımda ve Rusiye Federatsiyasında uydurılğan davalar sebebinden apiste eñ azd 250 Ukraina vatandaşı buluna. Siyasiy mabüslerniñ bir qısmı yarımadada tutula, digerleri Rusiyede tutula. Qanunsız sürgün etüv devam ete, jurnalist ve faalcilerni ise uzaq Rusiye müstemlekelerine alıp keteler.
"Taqipler tek quvetleşe. Nezaretimiz ve vesiqalarımızdan körüngenine köre, repressiyalarğa oğrağan insanlarnıñ çoqusı "diverssiya", "casuslıq", "devlet hainligi" kibi yalan qabaatlavlarnen qabaatlana. İşğal etilgen Qırımda vatandaşlarnı taqip etüvniñ eñ tarqalğan aletlerinden biridir", - dep Qırım uquq qorçalayıcı gruppasınıñ idare reisi Olğa Skrıpnık tarif etti.
Kiçik aynıñ 12-nde Avropa insan aqları makemesi Rusiyeni söz serbestliginiñ sistematik basqı ve Ukrainağa qarşı cenkni tenqit etken insanlarnıñ taqip etilmesinde qabaatladı. Makeme ayrı qayd etti ki, Qırımdaki işğalli makemelerniñ bütün "qararları" qanunsızdır.
Telegram, WhatsApp ve Facebookta Suspilne Qırım haberlerine abune oluñız
