İşğal etilgen Qırımda "makeme" 61 yaşındaki Qırım sakini Yunus Maşaripovnı "patlayıcı maddelerni azırlağanı ve saqlağanı" içün qabaatlap, beş yılır Rusiye psihiatrik hastahanesinde mecburiy tedaviylevde buluna.
"Gratı" neşiri bu aqqında yazdı.
Maşaripov 2017 senesi ilk küz ayında "bölgede vaziyetni kerginleştirmek içün" patlayıcı aletlerni azırlağanında qabaatlanıp tutuldı. O, basqı altında qabaatını tanıdı, amma makemede işkencege oğratılğanını aytıp, itiraf etmekten vazgeçti.
"Fizikiy ağrı sebebinden, artıq dayanıp olamağanım içün, öz irademe qarşı küfür etmege başladım, yani eşitmege istegenleri şeylerni aytmağa mecbur oldım", — dep Qırım SİZOsından Maşaripov Ukraina sabıq prezidenti Petro Poroşenkoğa, Qırım ve Sevastopoldaki (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) FSB idaresiniñ vekili Viktor Palaginğa mektübinde yazdı.
2018 senesi Yalta makemesi Maşaripovnı müstemlekede dört yılğa ve para cezasına maküm etti. Kassatsiyadan soñ dava tekrar baqılmasına yollanıldı, soñra makeme ükümni mecburiy psihiatrik tedaviylevge deñiştirdi. Apelâtsiyalardan biri, davanıñ esas delillerini lâğu etti.
"Makeme, adamğa qarşı patlayıcı maddelerni yapuv boyunca cinaiy davanı toqtattı. Makeme, FSB hadimleri tarafından advokatsız yapılğan biologik örneklerniñ alınmasını delil olaraq qabul etmedi. Bundan da ğayrı, makeme, Maşaripovnı patlayıcı aletni saqlağanınen bağlağan biologik ekspertizanıñ hulâsasını qanunsız dep tanıdı", — dep advokat Oleksiy Ladin bildirdi.
2020 senesinden başlap Yunus Volgograd vilâyetinde "intensiv nezaret" hastahanesinde tutula. Apiske alınğannıñ qorantasınen bağ yoq edi, faalci Mariana Markova onı tapıp, qonuşmağa başlağanda, hastahane memuriyeti bunı toqtatmağa tırıştı. Taqiqat ve makeme esnasında çoqusı bozuluvlarğa baqmadan, makemeciler mustaqil ekspertizanı bir qaç kere red ettiler.
"Memorial" uquq qorçalayıcı merkezi Maşaripovnı siyasiy repressiyalarnıñ fedaları cedveline kirsetti, amma onı siyasiy mabüs olaraq tanımadı. Bundan evel uquq qorçalayıcılar cinaiy davanıñ malümatlarını ögrenmeliler.
"Şimdilik, Yunus Maşaripovnı siyasiy mabüs olaraq tanıma imkânını bermeycek cinaiy dava ve onen bağlı vaqialar aqqında vesiqalarımız ve yeterli malümatımız yoq. Amma onıñ cinaiy davasında siyasiy sebepli ve qanunnı bozğan alâmetlerni köremiz", — dep uquq qorçalayıcılar öz qararını añlattılar.
Telegram, WhatsApp ve Facebookta Suspilne Qırım haberlerine abune oluñız
