Rusiyeniñ Rostov-na-Donudaki Cenübiy bölgeniñ arbiy makemesi işğal etilgen Qırımnıñ Yalta sakinini "devlet hainligi, terrorizm, cemaat erbabınıñ ayatına ücüm ve patlayıcı maddelerniñ qanunsız qullanuvı" (RF Ceza qanunnamesiniñ 275-inci maddesi, 205.3 maddesi, 277-inci maddesi, 222.1-inci maddesiniñ 4-ünci qısmı, 223.1-inci maddesiniñ 3-ünci qısmı ve 222-inci maddesiniñ 4-ünci qısmı) sebebinden 24 yılğa apiske aldı. O, şimdi işğal etilgen yarımadada yaşağan sabıq Ukraina halq mebusı Oleğ Tsarövge ücüm etkeninde qabaatlandı.
Rusiye Baş prokurorlığı bunı bildirdi.
O, beş yıl apishanede, qalğanını ise sert rejimli müstemlekede keçirecek, dep bildirildi. Bundan da ğayrı, adamnı bir yıl altı ayğa azatlıqtan marum qaldırdılar ve 800 biñ rublelik para cezasını belgilediler.
Taqiqatnıñ aytqanına köre, maküm etilgen adam Ukraina havfsızlıq hızmetiniñ hadiminen bağ qurdıp, Qırımda olar içün Rusiyege qarşı malümat toplamağa, em de "Yuqarı Şuranıñ sabıq mebusı Oleğ Tsarövge qarşı suiqastta iştirak etmege" razı oldı.
Rusiye Baş prokurorlığınıñ qayd etkenine köre, adam "terroristik faaliyetinde talim aldı, evinde saqlağan öz başına yapılğan patlayıcı cihazını azırladı".
Bundan evel Qırım uquq qorçalayıcı gruppasınıñ tedqiqatçısı İrına Sedova bildirdi ki, kiçik aynıñ 1-ne qadar işğal etilgen Qırımda içtimaiy ağlardaki yazılar, ukrain timsalleriniñ qullanılması ve vatanperver yırlarınıñ icrası sebebinden eñ az 993 memuriy dava qayd etildi.
2024 senesiniñ malümatına köre, işğal etilgen Qırımda ve Rusiye Federatsiyasında uydurılğan davalar sebebinden apishanelerde eñ az 250 Ukraina vatandaşı buluna. Siyasiy mabüslerniñ bir qısmı yarımadada, digerleri ise Rusiyede tutula. Qanunsız sürgün etüv devam ete, jurnalist ve faalcilerni ise uzaq Rusiye müstemekesine alıp keteler.
"Taqipler tek quvetleşe. Nezaretimiz ve vesiqalarımızdan körüngenine köre, repressiyalarğa oğrağan insanlarnıñ çoqusı yañlış qabaatlanıp, sözde "diverssiya", "casuslıq", "devlet hainligi"nen qabaatlana. İşğal etilgen Qırımda vatandaşlarnı taqip etüvniñ eñ tarqalğan aletlerinden biridir", — dep Qırım uquq qorçalayıcı gruppasınıñ idare reisi Olğa Skrıpnık tarif etti.
Kiçik aynıñ 12-nde Avropa insan aqları makemesi Rusiyeni söz serbestliginiñ sistematik basqısı ve Ukrainağa qarşı cenkni tenqit etken insanlarnıñ taqip etilmesinde qabaatladı. Makeme ayrı qayd etti ki, Qırımdaki işğalli makemelerniñ bütün "qararları" qanunsızdır.
Oleğ Tsaröv aqqında ne bilemiz
- "Patriya regionov"dan sabıq halq mebusı Oleğ Tsaröv 2014 senesi Rusiyege qaçıp ketti. Rusiye istilâsından soñ o, Ukraina devlet sıñırından qanunsız alda keçip, vaqtınca işğal etilgen Qırımğa kelip, Rusiye arbiylerine işğalci rejimni qurmağa yardım etti.
- 2022 senesi saban ayında Ukraina Baş prokurorınıñ ofisi Tsarövge Ukraina topraq bütünligine qast etüv ve duşmannen işdeşlikte şübeli olğanını bildirdi.
- 2023 senesi mayısnıñ 11-nde UHH oña cenk vaqtında yapılğan devlet hainliginde daa bir şübheli olğanını bildirdi.
- 2023 senesi orta küz ayınıñ 27-nde gece işğal etilgen Qırımda Yaltada devlet hainliginde şübheli sayılğan Ukraina sabıq halq mebusı Oleğ Tsarövge öldürüv ıntıluvı yapıldı. Onı öldürmege tırıştılar. Şimdi Tsaröv ağır alda reanimatsiyada buluna.
- Saat 12:28-de Tsarövniñ Telegram kanalında video peyda oldı, yardımcısına yapılğan ücüm aqqında malümatnı onıñ tuvğanları tasdıqladı. Bundan soñ FSB "devlet erbapınıñ canına ücüm" davasını açtı.
- İçtimaiy havfsızlıq hızmetiniñ menbaları bildirdi ki, Yaltada devlet hainliginde şeklengen sabıq halq mebusı Oleg Tsarövge qarşı ücüm — UHHniñ mahsus operatsiyasıdır.
- 2024 senesi boş aynıñ 27-nde yasaq etilgen "Partiya regionov"dan sabıq mebus Oleğ Tsarövge Rusiye Federatsiyasınıñ silâlı istilâsına para bergen sebebinden 8 yılğa qadar apis cezasına ğıyabiy şekilde maküm etildi. Maheme, onıñ 480 million ğrıvnâlıq mülkiyetini de tevqif etti.
Telegram, WhatsApp ve Facebookta Suspilne Qırım haberlerine abune oluñız
