İşğal etilgen Qırımda rusiye akimiyeti, ukrainlerni ukrain mevamı içün cezalandırıp olarğa qarşı basqılarnı devam ete. Böyleliknen, içtimaiy ağlarda yazılar, ukrain timsalâtnıñ qullanuvı ve vatanperver yırlarnıñ aytuvı içün memuriy davalarnıñ eñ azdan 993 vaqiası qayd etilgen.
Bunıñ aqqında "İşğal etilgen Qırım: 2024 senesi Rusiyenen kim ve ne içün taqip etilgen" matbuat konferentsiyası vaqtında Qırım uquq qoruyıcı gruppasınıñ tetqiqatçısı İrına Sedova bildirdi.
"Şimdi olar rusiye ordusını itibardan tüşürgen er kes cezalandırılmaq kerek olğanını anlatqan memuriy bozuluvlarnıñ kodeksiniñ 20.3.3 maddesini alet olaraq qullanalar. Ve büyük miqyaslı ücüminden başlap böyle 993 davasını endi vesiqalaştırdıq", – qayd etti o.
İşğal akimiyeti, "Qırım Ukrainadır" sözlerinen yazısı, ukrain timsalâtnıñ kösterüvi ve "Oy, u luzi çervona kalına" yırınıñ aytuvı içün insanlarğa cöreme ödete. Bundan da ğayrı, Qırımda üç tişlikni resmiy tarzda "ekstremist timsali" kibi tanıdılar.
"İşğalciler ilerige devam eteler, çünki çoqusınen öz makeme qararlarında üç tişlikni ekstremist timsali kibi tanığanlar, insanlarnı içtimay ağlarda paylaşılğan üç tişligi ya da onıñ timsalinen kiyinilgen urbası içün 15 künge oturtalar. Böyle vaqiaları da qayd etilgen. Em de rusiye federatsiyasınıñ strategik maqsadı – ukrainlerniñ taqip etilmesidir", - qayd etti o.
Telegram, WhatsApp ve Facebookta Suspilne Qırım haberlerine abune oluñız
