Rostov-na-Donudaki Cenübiy bölgeniñ arbiy makemesi işğal altındaki Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeriniñ 30 yaşındaki sakinini Rusiye arbiy hızmetçisiniñ evine bomba qoymağa tırışqanında qabaatladı. O, sert rejimli müstemlekede 17 yılğa üküm etildi.
Cenübiy bölbeniñ arbiy makemesiniñ Telegram saifesinde böyle malümat bildirildi.
Taqiqatnıñ versiyasına köre, adam Ukraina istihbaratınıñ vazifesi boyunca areket etip, radioaktiv patlayıcı cihaznı qullanğan edi. İşğalcilerniñ aytqanına köre, patlayıcı bir gizli yerde saqlanıp, evniñ kirişinde gaz borusına asılğan edi. Asker evden çıqqanda patlayıcı cihaz patlanacaq edi. Adamnıñ niyeti amelge keçmedi, çünki onı tutıp aldılar.
"Makeme qararına binaen, adam qabaatlı tanıldı ve sert rejimli müstemlekede 17 yılğa üküm etildi, apis cezasınıñ birinci 3 yılını apishanede keçirecek , 300 000 ruble (141 500 ğrıvnâ) para cezasını aldı", — dep aytıla haberde.
Hatırlatamız ki, işğalli Sevastopol (Aqyar) şeer makemesi 24 yaşındaki yerli sakinni "devlet hainligi" içün sert rejimli müstemlekede 15 yılğa üküm etti, 200 biñ ruble (60 biñ ğrıvnâ) para cezası ve bir yılğa azatlıqtan marum qaldıruv cezası berildi.
Telegram, WhatsApp ve Facebookta Suspilne Qırım haberlerine abune oluñız
