Kiçik aynıñ 26-nda işğalli Qırım Yuqarı makemesi "Hizb ut-Tahrir" davasınıñ dörtünci Canköy gruppasınıñ mabüsleri içün sıñırlav tedbirini deñiştirmedi. Emir Kurtnezirov, Abibulla Semedlâyev, Rustem Mustafayev, Bahtiyar Ablayev, Mirzaali Tajıbayev çiçek ayına qadar apiste qalacaqlar.
"Qırım birdemligi" Edem Semedlâyev ve Emil Kurbedinov adliyecilerine atfı etip bunı bildirdi.
"Semedlâyevniñ aytqanına köre, makeme, imayecisi altında bulunğan adam — Abibulla Semedlâyev — gizlenmege, delillerni yoq etmege ve şaatlarğa tesir etmege niyetlengenini köstermegen iç bir delilge qulaq asmadı. Makeme, taqiqatçınıñ aytqanı fikirlerni alıp, öz qararında tekrar yazıp qoydı", — dep aytıla haberde.
Advokat Emil Kurbedinovnıñ qayd etkenine köre, makeme onıñ müvekkili Mirzzali Tajıbayevni apiste tutmaq içün sebep olmağanına dair delillerni de köz ögüne almadı.
"Aslında, olarnı tek nazar noqtaları içün SİZOda tutalar. İnsanlar qabaatını tanımay, özleri ve başqalarnı aldatmağa red eteler", — Kurbedinov dedi.
Kiçik aynıñ 5-nde saba beş qırımtatar faalcileriniñ evleri tintildi. Aynı künü Emir Kurtnezerov, Rustem Mustafayev ve Abibulla Semedlâyev 60 künge SİZOğa yollanıldı.
Kiçik aynıñ 6-nda Mirzaali Tajıbayev ve Bahtiyar Ablayev içün de aynı qorçalayıcı tedbir alındı. İşğalli makeme dava iştirakçilerini "Hizb ut-Tahrir" diniy teşkilâtınıñ faaliyetinde qabaatladı.
Qabaatlanğan qırımtatarlarnıñ soy-sopları tintüvler vaqtında olarğa yasaq etilgen kitap ve levhalar qoyulğanını tarif ettiler.
Telegram, WhatsApp ve Facebookta Suspilne Qırım haberlerine abune oluñız
