Ukraina prezidentiniñ Qırımdaki temsilciligi kiçik aynıñ 5-nde beş qırımtatarnıñ tutulğanına dair beyanat berdi. O bildirdi ki, Rusiye işğalcileriniñ areketleri insan aqları ve halqara gumanitar uquq qaidelerini boza.
Bunı prezident temsilciliginiñ resmiy saytında aytıla.
Qayd etildi ki, işğalciler yarımadada ukrain vatandaşlarını muntazam sürette taqip eteler. Bunı yapmaq içün qanunsız yaqalavlar ve uydurılğan davalar boyunca memuriy ve cinaiy mesüliyetke çeküv usullarını qullanalar.
"Bizler, bütün mevcut olğan halqara meydançıqlarnı qullanıp, vatandaşlarımıznıñ aqlarını qorçalamağa ve adaletke irişmege devam etecekmiz. Tek Qırım yarımadasınıñ işğalden azat etilmesi onıñ sakinlerini siyasiy, diniy ya da qavmiy sebeplerden repressiyalardan qorçalamağa temin ete bile. Vaqtınca işğal etilgen Qırımda insan aqlarınıñ bozuluvına qarşılıq köstermek içün bütün halqara toplulıqqa muracaat etemiz ve Rusiye tarafından Ukraina vatandaşlarınıñ siyasiy sebeplerden taqip etilmesini tez vaqıtta toqtatmaq içün ğayretlerni birleştirmege çağıramız", — dep temsilcilikniñ beyanatında bildirildi.
Qırımda qırımtatarlarnıñ qıdıruvı ve tutulması aqqında ne bilemiz
Kiçik aynıñ 5-nde saba Qırımnıñ Canköy rayonında Rusiye FSBsiniñ hadimleri qırımtatarlarnıñ evlerini kütleviy şekilde tinttiler.
Tintüvlerden soñ Rusiye quvetçileri Emir Kurtnezerov, Abibulla Smedlâyev, Rustem Mustafayev, Mirzaali Tacıbayev ve Bahtiyar Ablayevni tuttılar. Tutulğanlarnıñ episi Simferopolğa (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adke) alıp ketirildi.
Kiçik aynıñ 5-nde işğalli makeme Emir Kurtnezirov, Rustem Mustafayev ve Abibulla Smedlâyevge 60 künge nezaret altında qorçalayıcı tedbirni sayladı.
Tutulğanlarnıñ imayesini advokatlar Edem Semedlâyev, Emil Kurbedinov, Safiye Şabanova, Marlen Halikov yapalar.
Telegram, WhatsApp ve Facebookta Suspilne Qırım haberlerine abune oluñız
