Prezident Volodımır Zelenskıy Qırımnıñ işğaline muqavemet kününe yarımadanıñ azat etilmesi içün küreş devam etkenini ve Qırım meselesi halqara kün tertibine qaytarılğanını qayd etti. Devlet yolbaşçısı, Ukraina işğalniñ "normalleşmesi"ne yol bermeycek ve topraq bütünligi içün küreşmege devam etecek, dep bildirdi.
O, öz Telegram kanalında bu aqqında yazdı.
Ukraina prezidenti hatırlattı ki, 11 yıl evelsi Rusiye Ukrainağa qarşı istilâğa Qırımnı zapt etüvnen başladı. Onıñ aytqanına köre, 2014 senesi kiçik aynıñ 26-nda olıp keçken adise-vaqialar ukrainlerniñ narazılığını numayış etti, o, alâ daa devam ete.
"Bu kün yalanğa inanmağan ve evini satmağan insanlar bar olğanını ve olacağını kösterdi. Qırımnıñ işğalinden soñki yıllar bir çoq keder ve tsinizm ketirdi. Dünyanıñ çoqusı, kerçekte ne olğanını añlamağa istemedi", — dep Zelenskıy qayd etti.
O, Qırım platformasınıñ meydanğa ketirilmesinden söz etip, Kıyivniñ Rusiyege işğalni "normalleştirmege" izin bermeycegini qayd etti. Volodımır Zelenskıy şunı da qayd etti ki, Ukraina Qırım siyasiy mabüslerini azat ete ve devletniñ topraq bütünligi içün küreşni devam ete.
"Ukrainanıñ topraq bütünligi, suvereniteti ve telükesizligi bir de bir razılaşma prdmeti olmaz. Bizim Qırımımızda muqacemet künü — namus, Ukrainağa ürmet künüdir", — dep devlet yolbaşçısı ayttı.
