Ukraina prezidentiniñ QMCdeki temsilciligi tarafından "Serbest Qırımğa mektüpler" aktsiyası çerçivesinde ukrain teatr, kino ve dublaj oyuncısı Antonina Hıjnâk siyasiy mabüs, qırımtatar faalcisi Tofik Abdulgaziyevniñ mektübini oqudı. O, qanunsız sürette sert rejimli müstemlekede 12 yılğa üküm etildi. Adamnıñ yayılğan aqciger veremi bar.
QMCdeki temsilcilik kiçik aynıñ 25-nde bu aqqında haber etti.
Şimdi Tofik Abdulgaziyev Rusiyeniñ Çelâbinsk şeerindeki 3-nci apis verem hastahanesinde kritik alda buluna. Qırımtatar Rusiye apishanesinde yaramay şaraitte tutulğanı içün reanimatsiyağa oğradı. Ukrain uquq qorçalayıcıları siyasiy mabüsniñ azat etilmesini talap eteler.
Kiçik aynıñ 23-nde Rusiye ekimleri onıñ limfatik sisteması bozulğanını tasdıqladı. İç köküsteki limfa düyümleri yanıp çürügen edi.
Temsilcilik teşebbüske qoşulmağa çağıralar.
"Mektüp yazıñız, dostlarıñızğa ve işdeşleriñizge aktsiya aqqında haber beriñiz, içtimaiy ağlarda paylaşıñız. Bu adiy adımlar vatandaşlarımızğa, er angi maniağa baqmadan, olarnıñ serbestligi içün küreşkenimizni añlatmağa yardım etecek. Qamaçav devam ete!" — dep temsilcilik qayd etti.
Hatırlatamız ki, Ukraina prezidentiniñ Qırım Muhtar Cumhuriyetindeki temsilciliginiñ haber teminatı bölüginiñ reberi Yevhen Bondarenko "Serbest Qırımğa mektüpler" teşebbüsi yarımadanıñ işğalden qurtarıluvına ve bütün ukrain siyasiy mabüsleriniñ azat etilmesine qadar devam etecek, dep bildirdi.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Telegram, WhatsApp ve Facebookta Suspilne Qırım haberlerine abune oluñız
