Qırımnıñ İşğalli Kirov rayon makemesi "Hizb ut-Tahrir davası"nıñ ekinci Aqmescit gruppasınıñ mabüsi, vatandaş jurnalisti Remzi Bekirovnıñ Hakasiya 33-nci tüzetüv müstemlekesine bergen memuriy davasını red etti. O, saba namaz qılğanı içün ceza izolâtorına (ŞİZO) yerleştirilüvini şikâyet etmege tırıştı. TM-33e etap etilgen soñ yarım yıl içinde jurnalist yedi kere ŞİZOğa qoyuldı.
Bekirovnıñ 40-ıncı doğğan kününde olıp keçken toplaşuv aqqında advokat Nazim Şeyhmambetov "Qırım birdemligi" cemaat teşkilâtına kiçik ayınıñ 24-nde tarif etti.
Toplaşuvda qırımtatar bildirdi ki, saba namaz bir qaç daqqa devam etti. Amma müstemleke hadimi oña qarşı bir şikâyet yazdı, çünki musulman ceza izolâtorınıñ tertibini bozğan edi.
Makemede müstemlekeniñ vekili, mabüslerniñ "medeniy-kütleviy tedbirleri" keçirilgenine dair vesiqalarnı taqdim etti, mabüsler "MUZ-TV" kanalını seyir etmek kerek ediler.
Bekirov esabatnı ve beş künge ŞİZOğa yerleştirilmesini red etti. O, Rusiye Anayasasında qayd etilgen din serbestligi aqqından faydalanğanını "makemege" bildirdi. Amma "makemeci" davanı red etip, adamnıñ namaz yerine televizor seyir etmesine "kün tertibini bozmaq içün yer yoq", dep qarar berdi.
İşğalli makemeniñ qararınen Bekirov da razı olmadı. Advokatnıñ aytqanına köre, o pek zayıf, amma adaletke ümüt ete ve "evge qayıp, tuvğanlarınen birlikte raat yaşamağa istey".
Bekirov TM-33 izolâtorına kirsetilgen soñ yarım yıl içinde yedi kere şu sebeplerden ŞİZOğa yerleştirilgen edi: gece namazını qıldı ya da havluğa, müstemleke hadiminen selâmlaşmadı, şapka kiymedi. O, daa eki ay sert sıñırlav şaraitinde tutıldı.
Bundan da ğayrı, qırımtatarlarğa tuvğanlarına telefon etmege bir kere bile izin berilmedi. Onıñ aytqanına köre, müstemlekede kündüz yatmağa yasaq eteler, ve hadimler "onı maneviy ceetten bastırmağa tırışalar".
Hatırlatamız ki, 2024 senesi ilk qış ayında körüşüvde Bekirov, domuz etinen aşamağa razı olmağanı sebebinden 15 kilo azğanını bildirdi.
Remzi Bekirov aqqında ne bilemiz
Remzi Bekirov — Qırım sakinlerine qarşı siyasiy sebepli davalarda tintüv ve makemelerniñ onlayn yayınlarını alıp barğan içtimaiy jurnalisttir. O, Qırımdaki siyasiy mabüslerniñ qorantalarına yardım etmek ğayesiniñ teşebbüsçisidir. Onıñ üç çağına yetmegen balası bar.
2019 senesi saban ayınıñ 27-nde Qırımda kütleviy tintüvler keçirildi. Taqiqat tedbirleri esasen qırımtatarlarnıñ yaşağanları Aqmescit civarındaki Bavurçı, Mamaq, Yañı Abdal köylerinde keçirildi. O vaqıt Rusiye FSBniñ hadimleri yigirmi insannı tuttılar. Daa üçü bir qaç kün içinde Rostov-na-Donu şeerinde tutuldı, üçü qıdıruvğa ilân etildi. Daa soñ bu iş üzerinde daa eki qırımtatar adamı tutuldı.
25 qırımtatar cemaat faalcisi "Hizb ut-Tahrir" islâm siyasiy firqasında iştirak etkeninde qabaatlandı. Apiske alınğanlarnıñ çoqusı "Qırım birdemligi" uquq qorçalayıcı birleşmesiniñ iştirakçileridir. Şaban Umerov, Remzi Bekirov, Riza İzetov ve Raim Ayvazov Rusiye Ceza qanunnamesiniñ 205.5 maddesiniñ 1-inci qısmına binaen terror teşkilâtınıñ faaliyetini teşkil etüvde qabaatlanalar.
2022 senesi saban ayınıñ 10-nda Rostov-na-Donudaki Cenübiy bölge arbiy makemesi, uquq qorçalayıcı Remzi Bekirovnı 19 senege maküm etti.
2024 senesi oraq ayında Bekirovnı Rusiyeniñ Krasnoyarsk vilâyetindeki 2. Yeniseysk apishanesinden çıqardılar. Bundan evel onı Qırımğa yaqın olğan Rusiye Federatsiyasınıñ Rostov vilâyetindeki müstemlekesine etap etmege red etken ediler. Adam tek maküm etilecek soñ etap yerine şikâyet etmek mümkün eken.
Qırım siyasiy mabüsi, 2024 senesi saban ayında müstemlekede bulunğan vaqıt apis cezasına qadar müddetini esapqa almağa tırıştı. Amma Bekirovnıñ davası baqılğan Çita şeeriniñ 2-nci Şarqiy bölge arbiy makemesi cevap yollamadı, ve müddetniñ ğayrıdan sayılması aqqında qararnı qabul etmedi. Bu sebepten qırımtatar apishanede belgilengen müddetten çoq tutuldı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız
