İşğalciler tarafından 19 yılğa maküm etilgen qırımtatar jurnalisti Remzi Bekirovnı Hakasiya Cumhuriyetindeki 33-nci tüzetüv müstemlekesiniñ (TM) memuriyeti beş künge ceza izolâtorına (ŞİZO) yolladı. TM-33 apishanesinde bulunğanından soñ yarım yıl içinde jurnalist yedi kere ŞİZOğa qoyuldı.
Qara qış ayınıñ 27-nde advokat Edem Semedlâyev "Qırım birdemligi" cemaat teşkilâtına bunı bildirdi.
O, qara qış ayınıñ 20-nde olğan makeme oturışında Bekirovnıñ ŞİZOda tutulğanını ögrendi.
Kreml mabüsiniñ apayı Halide Bekirovanıñ aytqanına köre, o, aqayından çoqtan berli mektüp almadı.
"Mende şu fikirler peyda oldı: onı tesadüfen ŞİZOğa yerleştirmedilermi? Ne içün o mektüpler yazmay?", — dedi o.
Bekirovnıñ advokatına aytqanına köre, mabüsler musulmanlar saba namazını qılğanı içün Rusiye müstemlekesiniñ memuriyeti daa beş insannı "içki tertipni bozğanları" içün izolâtorğa yerleştirdi.
TM-33 izolâtorına tüşken soñ yarım yıl içinde Bekirov yedi kere şu sebeplerden ŞİZOğa yerleştirilgen edi: gece namazı qılğanı ya da yüzbezni tutqanı, müstemleke hadiminen selâmlaşmağanı, şapka taqmağanı. O, daa eki ay sert sıñırlav şaraitinde tutıldı.
Bundan da ğayrı, qırımtatarğa tuvğanlarına telefon etmege bir kere bile izin berilmedi. Onıñ aytqanına köre, müstemlekede kündüz yatmağa yasaq eteler, ve hadimler "[onı] maneviy ceetten bastırmağa tırışalar".
Hatırlatamız ki, 2024 senesi ilk qış ayında körüşüvde Bekirov, domuznen aşamaqtan vazgeçkeni içün 15 kg azğanını bildirdi.
Remzi Bekirov aqqında ne bilemiz
Remzi Bekirov — Qırım sakinlerine qarşı siyasiy sebepli davalarda tintüv ve makemelerniñ onlayn yayınlarını alıp barğan içtimaiy jurnalisttir. O, Qırımdaki siyasiy mabüslerniñ qorantalarına yardım etmek ğayesiniñ teşebbüsçisidir. Onıñ üç çağına yetmegen balası bar.
2019 senesi saban ayınıñ 27-nde Qırımda kütleviy tintüvler keçirildi. Taqiqat tedbirleri esasen qırımtatarlarnıñ yaşağanları Aqmescit civarındaki Bavurçı, Mamaq, Yañı Abdal köylerinde keçirildi. O vaqıt Rusiye FSBniñ hadimleri yigirmi insannı tuttılar. Daa üçü bir qaç kün içinde Rostov-na-Donu şeerinde tutuldı, üçü qıdıruvğa ilân etildi. Daa soñ bu iş üzerinde daa eki qırımtatar adamı tutuldı.
25 qırımtatar cemaat faalcisi "Hizb ut-Tahrir" islâm siyasiy firqasında iştirak etkeninde qabaatlandı. Apiske alınğanlarnıñ çoqusı "Qırım birdemligi" uquq qorçalayıcı birleşmesiniñ iştirakçileridir. Şaban Umerov, Remzi Bekirov, Riza İzetov ve Raim Ayvazov Rusiye Ceza qanunnamesiniñ 205.5 maddesiniñ 1-inci qısmına binaen terror teşkilâtınıñ faaliyetini teşkil etüvde qabaatlanalar.
2022 senesi saban ayınıñ 10-nda Rostov-na-Donudaki Cenübiy bölge arbiy makemesi, uquq qorçalayıcı Remzi Bekirovnı 19 senege maküm etti.
2024 senesi oraq ayında Bekirovnı Rusiyeniñ Krasnoyarsk vilâyetindeki 2. Yeniseysk apishanesinden çıqardılar. Bundan evel onı Qırımğa yaqın olğan Rusiye Federatsiyasınıñ Rostov vilâyetindeki müstemlekesine etap etmege red etken ediler. Adam tek maküm etilecek soñ etap yerine şikâyet etmek mümkün eken.
Qırım siyasiy mabüsi, 2024 senesi saban ayında müstemlekede bulunğan vaqıt apis cezasına qadar müddetini esapqa almağa tırıştı. Amma Bekirovnıñ davası baqılğan Çita şeeriniñ 2-nci Şarqiy bölge arbiy makemesi cevap yollamadı, ve müddetniñ ğayrıdan sayılması aqqında qararnı qabul etmedi. Bu sebepten qırımtatar apishanede belgilengen müddetten çoq tutuldı.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız
