Ukrainanıñ Türkiyedeki yañı elçisi Qırımtatar Milliy Meclisiniñ reisiniñ birinci muavini, sabıq siyasiy mabüs Nariman Celâl olacaq.
Prezident Volodımır Zelenskıy Türkiyedeki matbuat konferentsiyasında bunı bildirdi.
"Bugün ukrain delegatsiyasında biznen Nariman Celâl bar, o, Qırımtatar Milliy Meclisiniñ reisiniñ muavini, Ukrainada pek itibarlı bir insandır, ve, yazıq ki, Rusiye repressiyalarına oğradı. Evge, bizim ukrain Qırımımızğa, qaytqanda onı yaqaladılar. Nariman tek vatanperver olğanı içün, tek açıq-aydın tutqan noqta-i nazarı içün üç yıl devamında Rusiye apishanesinde bulundı, o yaramay bir şey yapmadı", — dedi prezident.
Volodımır Zelenskıynıñ aytqanına köre, Nariman Celâlnıñ bugün resmen açılğan Ukraina elçiliginiñ yañı binasında çalışıp başlaması timsal ola.
Nariman Celâlnıñ Türkiyedeki Ukraina elçisi olacağı aqqında prezident ilk sefer 2024 senesi ilk qış ayınıñ 20-nde bildirdi. Prezident ofisiniñ saytında emir daa yoq.
Nariman Celâl aqqında ne bilemiz
Nariman Celâl — 2013 senesinden berli Qırımtatar Milliy Meclisiniñ reisiniñ birinci muavini.
Celial 2021 senesi berim ayınıñ 4-nde Yevpatoriyada (Kezlevde), Perevalne köyünde gaz borusını patlatqanında qabaatlanıp, işğalci akimiyet tarafından yaqalandı.
2022 senesi berim ayınıñ 21-nde Qırımnıñ işğalci Yuqarı mahkemesi onı 17 yıl sert rejimli koloniyada qalmasına, 700 biñ rublelik para cezasına ve 1,6 yıl areket serbestliginiñ sıñırlanmasına üküm etti.
2023 senesi bozarğan ayda Aqmescitteki SİZO memuriyeti tarafından Celâlnıñ bedeniy ve maneviy cezalandırılması aqqında belli oldı. 2023 senesi oktâbr ayınıñ başında onı Rusiye apishanesine avuştırdılar.
2024 senesi oraqnıñ 28-nde Nariman Celâl esir almaşuvı çerçivesinde Ukrainağa qaytarıldı.
2024 senesi ilk qış ayınıñ 20-nde Ukraina prezidenti Volodımır Zelenskıy Nariman Celâlnıñ Türkiyedeki Ukraina elçisi olacağını bildirdi.
Telegram, WhatsApp ve Facebookta Suspilne Qırım haberlerine abune oluñız
