Rusiye quvetçileri, Noman Çelebicihan qırımtatar batalyonında iştirak etkeninde qabaatlanğan Herson vilâyetiniñ 64 yaşındaki sakini Bekir Gugurıknı tuttılar. Onıñ qardaşı, 53 yaşındaki Rustem Gugurık, eki yıl evel işğalciler tarafından sert rejimli müstemlekede 8,5 yılğa üküm etildi.
Qırımtatar Maaliy Merkezi (QMM) bunı bildirdi.
Qayd etildi ki, adamnıñ tutulması — vaqtınca işğal etilgen topraqlarda rusiye işğalcileri tarafından sıq qullanılğan aile repressiyalarınıñ daa bir örnegidir.
"Eki qardaşnıñ Noman Çelebicihan adına batalyonnen iç bir alâqası yoq edi, amma Rusiye akimiyeti bu uydurılğan qabaatlavlarnı qırımtatar halqını qorquzmaq ve yoq etmek içün qullana. Rustem Gugurık 2022 senesi saban ayınıñ 31-nde işğal etilgen Novooleksiyivka şeerinde tevqif etildi, aynı sene orta küz ayınıñ 26-nda ise sert rejimli müstemlekede 8,5 yılğa üküm etildi. O, Burât Cumhuriyetiniñ Ulan-Ude şeerindeki 8-nci tüzetüv müstemlekesinde ceza çeke, anda kerekli tibbiy yardım kösterilmegeni sebebinden sağlıq vaziyeti pek fenalaşa", — dep QMMniñ haberinde bildirildi.
Bundan da ğayrı, müstemlekede adam sol qulağında eşitüv qabiliyetini coydı. O, ağır nefes ala, lâkin kerekli tedaviylevni almay — oña tek qan şinici ilâclar berile.
"64 yaşındaki Bekir Gugurık da telüke astındadır. Onıñ yaşına ve apis şaraitine köre, apishanede bulunması oña büyük bir sınav ola bile. Adamnı uydurılğan qabaatlavlar sebebinden 15 yılğa qadar apis cezası bekley", — dep QMMniñ beyanatında qayd etildi.
Telegram, WhatsApp ve Facebookta Suspilne Qırım haberlerine abune oluñız
