Burât Ulusındaki müstemlekede tutulğan qırımtatar siyasiy mabüsi Rustem Gugurık işğalcilerden tibbiy yardım almay. Adamnıñ sağlığı bayağı fenalaştı.
Qırımtatar Maaliy Merkezine Rustem Gugurıknıñ ömür arqadaşı Viktoriya bu aqqında haber etti.
Rustem Gugurık ağır nefes aluv, qızaruv ve tedaviylevge muhtac olğan ciddiy tiş meselelerinden zarar köre. Soñki vaqıtları bir qulağınıñ eşitüv qabiliyetini bütünley ğayıp etti. Viktoriyanıñ aytqanına köre, adamnıñ ayatı içün telüke bar, çünki ilâcnıñ terkibi ya da qullanıluvı añlatılmayıp berile.
Siyasiy mabüsniñ aşamaqnen meselesi sebebinden aş aşağan soñ accı ağrılar duya. Çoq muracaatqa baqmadan, müstemlekeniñ memuriyeti mabüsniñ sağlıq vaziyetine diqqat etmey, onıñ alı ise kün-künden fenalaşıp tura.
Rustem 74 mabüsnen beraber kamerada tutula. Kameranıñ şarait yahşı degil: anda sıq-sıq sıçanlar peyda ola. Onıñ aytqanına köre, qıyın şaraitke baqmadan, mabüslernen munasebetleri yahşı.
Amma müstemlekeniñ memuriyeti şikâyet arizasını bermemesi içün qoşma basqı yapa. Viktoriyanıñ aytqanına köre, Rustem bu sene üç kere ceza izolâtorında (ŞİZO) bulundı.
Ömür arqadaşınıñ uzaq mesafe sebebinden aqayını ziyaret etmek imkânı yoq. Posılkalaarnı yollamasınen de qıyınlıqlar ola, şunıñ içün qoranta, Rustem müstemlekede aşayt mallarını satın ala bilmesi içün, para kartasına yollamağa tırışa.
Rustem Gugurık aqqında ne bilemiz
2022 senesi saban ayınıñ 27-nde FSB hadimleri onı Herson vilâyetiniñ Qırımnen memuriy sıñırında Çonğarda tuttılar.
Barışıq vaqtında çoq balalı qırımtatar adamı taksici olaraq çalışqan edi. O, insanlarnı Çongarğa alıp ketken edi. O künü, Rusiye istilâsı sebebinden, adam qorantasını Bağçasarayda tuvğanlarına alıp ketmege tırışa edi.
2016 senesi Rustem ve qardaşı Bekir Gugurık 2021 senesine qadar işğal etilgen Qırımğa kiriş yasağı aqqında haber aldılar.
Saban ayınıñ 31-nde belli oldı ki, Rusiye kontrolindeki Aqmescitniñ Kıyiv rayon makemesi Rustem Gugurıknı "Noman Çelebicihan adına göñülli batalyonda" iştirak etkeninden şübeli sayılıp, eki ayğa apiske aldı.
2022 senesi orta küz ayında Aqmescitniñ işğalli Kıyiv rayon makemesi Gugurıknı "Noman Çelebicihan adına batalyon"da iştirak etkeni içün müstemlekede 8,5 yılğa üküm etti.
Rusiye Ceza qanunnamesiniñ 208-inci maddesiniñ 2-nci qısmına binaen ("federal qanunğa uymağan silâlı birleşmede iştirak etüv") Aqmescitniñ Kıyiv rayon makemesiniñ "makemecisi" Olga Kuznetsova üküm çıqardı.
Telegram, WhatsApp ve Facebookta Suspilne Qırım haberlerine abune oluñız
