Simferopoldaki (AqmescitRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adteki) işğalli makeme bugün, kiçik aynıñ 5-nde, saba Federal havfsızlıq hızmetiniñ (FSB) hadimleri tarafından qanunsız olaraq tutulğan üç qırımtatar içün qorçalayıcı tedbirni aldı.
"Qırım birdemligi" bunı bildirdi.
Qayd etilgenine köre, söz tutulğan Emir Kurtnezerov, Rustem Mustafayev ve Abibulla Smedlâyev aqqında kete.
Saat 16:30 bütün makeme oturışları qapalı rejimde keçirile, dep haber etildi. İşğalli mahkeme Emir Kurtnezirovnı apiske almağa qarar berdi. O, 2025 senesi çiçek ayınıñ 4-ne qadar apiste qalacaq.
"İmayeci taraf ev apisini saylamağa rica etti, Kurtnezirov bir yerde saqlanmaycağını añlattı. Onıñ Qırımda küçlü içtimaiy bağları, işi, qorantası, qart babası bar. Amma makeme taqiqatçınıñ muracaatını qanaatlendirdi", — dep aytıla haberde.
Advokat Edem Semedlâyevniñ aytqanına köre, bugün üç qanunsız tutulğan şahıs içün qorçalayıcı tedbir alındı, kiçik aynıñ 6-nda ise daa eki qırımtatar içün qorçalayıcı tedbir alınacaq.
"Er şey standart: bir ay ve 30 künge — 2025 senesi çiçek ayınıñ 4-ne qadar — qorçalayıcı tedbir alındı. Bu qararlarnı şikâyet etecekmiz. Adamlar içün bu şok olsa da, bayağı memnünliktir. Er keske destekleri içün teşekkürler bildireler", — dedi advokat.
Qırımda qırımtatarlarnıñ evleriniñ tintilmesi ve tutulması aqqında ne bilemiz
Kiçik aynıñ 5-nde saba Qırımnıñ Canköy rayonında Rusiye FSBniñ hadimleri qırımtatarlarnıñ evlerini kütleviy şekilde tinttiler.
Tintüvlerden soñ Rusiye quvetçileri Emir Kurtnezerov, Abibulla Smedlâyev, Rustem Mustafayev, Mirzaali Tacıbayev ve Bahtiyar Ablayevni tuttılar. Tutulğanlarnıñ episi Simferopolğa (Aqmescitke) alıp ketirildi.
Tutulğanlarnıñ imayesini advokatlar Edem Semedlâyev, Emil Kurbedinov, Safiye Şabanova, Marlen Halikov yapalar.
Telegram, WhatsApp ve Facebookta Suspilne Qırım haberlerine abune oluñız
