"Hizb ut-Tahrir davasında" ekinci Aqmescit gruppasınıñ iştirakçısı, qırımtatar faali Rustem Seythalilov, altı yıl içinde ilk sefer anasınen körüşti. O, siyasiy mabusınıñ 41-ci doğğan kününide qara qış aynıñ 18-de olğan. 14 yılğa makeme etilgen erkekni Kareliya Cumhuriyetiniñ Petrozavoddaki 9-cı qattı nizamlı icraiy müstemlekesinde tutalar.
Bunı siyasiy mabusınıñ ömür arqadaşı Elzara Seythalilova öz Facebook saifesinde haber etti.
Kreml mabusınıñ anası, yaşına ve seyaatnıñ zor oluvına baqmadan Kareliyağa 2 700 ziyade kilometrni qararnen eki kün içinde keçken edi. Onı 2018 senesinde qapatılğan oğlunı körip olmağan sebebinden körmege ümüti quvetlendire edi, yaza Rustemniñ ömür arqadaşı.
"Üç balamıznı evde qaldırmağa mecbur oldım. Biñlerce kilometr mesafesinde belli olmağan yonelişke ufaq ballarımnen ilk sefer çıqqan yoluna ketmege qarar bermedim", – tarif etti Elzara Seythalilova.
Qattı nizamlı müstemlekesinde qattı şaraitlerine riayet eteler – "er şey daqqağa qadar yazılğan". "Qurannı qullanmağa yasağına", namaz qıluvı ise – şahsiy vaqıtınen sıñırlanğanına atıf etilip qırım tatarından din kitabını musadere ettiler. Ayrıca, mabuslarğa saba namazını (facr) qılmağa izin bermeyler.
"Dinini kütken musulmanı içün o, ciddiy bir meselesi ve öz dinine kerek olğanı kibi riayet etilmesinde onıñ aqlarınıñ bozuluvıdır", – qayd etti ömür arqadaşı Seythalilova.
Aynı zamanda erkeginiñ sağlıq alı kerginleşe: onı sürekli baş ağrıları ve beş künlik inelev kursından soñ bile çezilip olamağan arqa meseleleri çekiştireler.
"Bu şikâyetlerni Rustemden zornen çekip aldım. Aqayım, bizden saqlamağa tırışıp er şey yahşı olğanında inandıra edi. Amma oña baqıp al deñişüvlerni birden kördim", – qayd etti siyasiy mabusınıñ apayı.
Sürekli üç künlik körüşüvi, "vaqıtnıñ bir ange çevirilüv" ani kibi olğan.
"Tez vaqıtta kene de ketip tuvğan evinden uzaq olğan yerde tuvğan adamnı qaldırmaq kerek. Bu şaraitlerde öz aqayımnı körmege ağır. Elhamdülillâ, maşalla olıp qala", – paylaşa Elzara.
Kreml mabusı er kesge selâm aytıp oña qol tutqanı içün teşekkürler bildirdi.
Rustem Seythalilov – tevqiften evel siyasiy mabüslerniñ ailelerini desteklengen, makeme oturışlarnı ziyaret etken ve tahqiqat tevqifhanelerde dindaşlarğa yardım etken "Qırım birdemligi" cemaat areketiniñ iştirakçısıdır. 2019 senesi saban ayında onı qırımtatarlarnıñ evlerinde kütleviy tintüvlerden soñ tutıp aldılar.
2019 senesi oraq ayında Avropa parlamenti, Seythalilovnen beraber bütün ukrain siyasiy mabüslerni azat etmege çağırğan. Lâkin 2022 senesi rusiyeliler onı RF-da yasaq etilgen "Hizb ut-Tahrir" teşkilâtında iştirağı içün makeme ettiler. Uquq qoruyıcılar fikir etkenleri kibi, dava, insan aqlarınıñ bozuluvı ile sahtelenip açılğan. Serbestlikte Rustemniñ anası, ömür arqadaşı ve üç balası qalğan. "Memorial" teşkilâtına siyasiy mabusı kibi tanığan.
"Hizb ut-Tahrir davası"nıñ ekinci Aqmescit gruppası aqqında ne bilemiz
2019 senesi saban ayınıñ 27-sinde Qırımda qırımtatarlarnıñ evlerini kütleviy şekilde tinttiler. Aqmescit rayonınıñ Bavurçı, Mamaq, Yañı Abdal meskün yerlerinde taqiqat işleri yapıldı. İşğalciler, 20 qırımtatar adamını Hizb ut-Tahrir halqara siyasiy fırqasına ait olmakta qabaatlatıp tuttılar.
Rus mahsus hızmetleri daa üç insannı qıdırmağa ilân ettiler. 2019 senesi saban ayınıñ 28-inde Rusiyeniñ Rostov vilâyetiniñ Aqsay şeerinde daa üç qırımtatar adamını tutqanını bildirdiler. Tutulğan adamlar arasında "Qırım birdemligi"niñ içtimaiy jurnlisti Osman Arifmemetov da bar edi.
Aynı kün işğal etilgen Aqmescitteki Kıyiv rayon makemesi, tutulğan adamlarnı tevqif etip maküm etti.
2019 senesi yaz mevsiminde "Hizb ut-Tahrir davası"nıñ bu gruppasında tutulğan insanlarnıñ sayısı 25ke arttı. Tutulğanlar arasında "Qırım birdemligi" içtimaiy uquq qorçalayıcı areketiniñ faalcileri çoq edi. Olar, Qırımda siyasiy sebepli taqipler fedalarını qorçalamağa yönelten faal işinen bellilerdi. Olar arasında uquq qorçalayıcılar, içtimaiy jurnalistler ve gönüllüler bar.
Çoq bilgi olğanı sebebinden işğalciler 25 iştirakçinen cinaiy davanı beşer gruppağa böldiler.
2022 senesi boş aynıñ 24-ünde Rostov-na-Donudaki Cenübiy bölge arbiy makemesi, davanıñ iştirakçilerini terror faaliyetinde ve akimiyet zapt etmekte qabaatlı tanıdı. Enver Ametov ve Yaşar Müedinov 13 senege, içtimaiy jurnalistler Roslan Süleymanov, Rustem Şeyhaliyev ve Osman Arifmemetov 14 senege maküm etildi. Siyasiy mabüsler dört sene apishanede geçirecek soñ bir sene areket sıñırlanmaları astında olacaqlar. Qabaatlanğan adamlar öz qabaatını tanımadılar ve taqip etilgenlerini siyasiy olğanını tüşüneler.
Hizb ut-Tahrir – islam siyasiy fırqası. 2003 senesi Rusiyede onı terroristik teşkiyatı kibi tanıdılar, oña ait olğanlarını ise taqip etmege başladılar. İştirakçılarnı "qabarcılıqqa qarşı faaliyetinde" ve "dünyaara hilâfet" degenini teşkil etmege ıntıluvında qabaatlaylar. 2014 senesi Qırımnıñ işğalinden soñ işğalciler zapt etilgen Qırımğa öz qanunnamesiniñ areketini tarqattılar. Böyleliknen, yarımadanıñ işğalinen razı olmaması içün qırımtatarlarına basqısını quvetleştirip, Hizb ut-Tahrir-ge alâqasında qırım musulmanlarnı da qabaatlamağa başladılar.
Telegram, WhatsApp ve Facebookta Suspilne Qırım haberlerine abune oluñız
