"Hizb ut-Tahrir davasın"nıñ ekinci Bağçasaray gruppasınıñ mabüsi Ali (Oleğ) Fedorovnıñ ceza izolâtorındaki bulunuvı Udmurtiya Cumhuriyetiniñ 5-nci tüzetüv müsemlekesinde dörtünci kere uzatıldı. Rusiye onı 13 yılğa üküm etti.
O, ömür arqadaşı İrına Fedorovağa mektübinde bunı yazdı, dep qara qış ayınıñ 13-nde "Qırım birdemligi" cemaat teşkilâtı bildirdi.
"Kelgen soñ, oña 10 kün, soñra da 15 kün berildi. Ekinci müddet soñuna yetip olamadı — daa eki kere 15 berdiler", — dep qayd etti onıñ apayı.
Aynı vaqıtta İrına Fedorova, aqayınıñ ŞİZOda tutulmasınıñ sebeplerini bilmey, dep bildirdi.
"Qırım birdemliginiñ" malümatına köre, Ali (Oleğ) Fedorov Bağçasaraydan kele. Apiske alınğanına qadar iş adamı ve Ramazan ayında iftaralarnıñ idarecisi edi.
O, siyasiy sebeplernen bağlı davalarnı baqqan, qırımtatar siyasiy mabüslerine qol tutuv malümat kampaniyasında iştirak etken, siyasiy mabüslerniñ qorantalarına maddiy yardım köstergen edi.
Fedorov 2021 senesi kiçik aynıñ 17-nde kütleviy tintüvler vaqtında tutuldı. 2022 senesi oraq ayınıñ 8-nde Cenübiy bölgeniñ arbiy makemesi onı 13 yılğa apiske aldı.
2023 senesi berim ayınıñ 16-nda siyasiy mabüs Novoçerkassk SİZOndan Rusiye Federatsiyasınıñ Lipetsk vilâyetiniñ Yelts apishanesine etap etildi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp ve Facebookta Suspilne Qırım haberlerine abune oluñız
