İşğalcilernen 12 yılğa azatlıqtan marum etilgen siyasiy mabusı Mecit Abdurahmanovnıñ tutuv şaraitlerni quvetleştirip onı kameralı soylü odasına (KSO) yerleştirdiler. Şimdi o, Çuvaşistan Cumhuriyetindeki Tsıvilsk şeeriniñ 9-TC-de buluna.
Bunıñ aqqında onıñ ömür arqadaşı Elmira Abdurahmanova haber etti, yaza "Qırım birdemligi".
O, böyle cezasınıñ sebebi belli olmağanını qayd etti. Siyasiy mabusı, memuriyetiniñ qararı aqqında telefon vastası ile haber etti – oña tek bir kere telefon etmege izin berdiler.
Ömür arqadaşınıñ sözlerine köre, Mecit Abdurahmanov tüzetüv cezahanesine kelgen soñ memuriyet onı karantinge qapatqan. Bundan soñ, siyasiy mabusını 15 künge cezahanege yolladılar, soñ daa yarım aynı qoştılar. Cezahanesinde tutuvı bitkende Mecit Abdurahmanovnı KSO-na yolladılar.
"KSO-da yarım yıl içinde tutulacağı aqqında aytqan, sebebi belli degil. Onen bağı yoq ve başqa bir şeyni bilmeyim", – tarif etti Abdurahmanova.
Hatırlatayıq ki, 2019 senesi saban aynıñ 27 Qırımda kütleviy tintüvler keçti. Tahqiqiy areketler çoqusınen qırımtatarlarnıñ yaşağan Aqmescitteki şeer qasabasında – Kamenka, Stroganovka, Beloyede keçirilgen ediler. RF FTH hadimleri o vaqıt yigirmi insannı tutıp aldılar. Daa üçni bir qaç kün soñ Rostov-na-Donuda tutıp aldılar, üçni – qıdıruvğa ilân ettiler. keççe bu davada daa eki qırımtatarını tutıp aldılar.
Mecit Abdurahmanovnen beraber 25 qırımtatar grajdan faalni "Hizb ut-Tahrir" islam siyasiy fırqasına alâqasında qabaatladılar. Tevqif etilgenlerniñ çoqusı, "Qırım birdemligi" uquq qoruyıcı birleşmesiniñ iştirakçıları olalar.
2023 senesi mayıs aynıñ 12 Cenübiy arbiy bölük makemesi, faal Mecit Abdurahmanovnı 12 yılğa azatlıqtan marum etüvine makeme etken.
Hizb ut-Tahrir – islam siyasiy fırqası. 2003 senesi Rusiyede onı terroristik soyu kibi dep tanıdılar, oña alâqalı olğanlarını ise taqip etmege başladılar. İştirakçılarnı "anayasasına qarşı faaliyetinde" ve "dünyaara hilâfetni" yaratmağa ıntıluvında qabaatlaylar. 2014 senesi Qırımnıñ işğalinden soñ işğalciler öz qanunlarınıñ faaliyetini zapt etilgen Qırımğa da tarqattılar. Hizb ut-Tahrir-ge alâqasında qırımlı musulmanlarnı da qabaatlamağa başladılar, böyleliknen yarımadanıñ işğalinen razı olmaması içün qırımtatarlarına basqısını quvetleştirip.
Telegram, WhatsApp ve Facebookta Suspilne Qırım haberlerine abune oluñız
