Ukrain uquq qorçalayıcıları, işğal etilgen Qırımda Rusiye quvetçileriniñ vatandaşlarğa nisbeten bütün qanunsız areketleri yerli memurlar, işğalcilernen işbirlik yapqanlar ya da köçken Rusiye vatandaşları olğan taqiqatçılar, prokurorlar ve makemeciler tarafından yapılğanını iddia eteler. Olarnıñ şahsiy malümatları ZMINA insan aqları merkezi tarafından memurlarnıñ "qara cedveli"ne kirsetilüvi ve ilerideki imayeciligi içün, hususan olarğa şahsiy sanktsiyalar kirsetilmesi içün toplanıp, vesiqalaştırıla.
ZMINA ilk qış ayınıñ 24-nde bunı bildirdi.
"Memurlarnıñ "qara cedveli"niñ teşkil etilmesi, işğal etilgen Qırımda ve Rusiye Federatsiyasınıñ toprağında vatandaş ealisini taqip etüv ve qanunsız apiske aluvda iştirak etken memurlarnıñ sayısını ve şahsiy sanktsiyalarnı kirsetmek içün yapqanları cinayetlerniñ çeşitlerini köstermek maqsadınen yapıldı. ZMINA insan aqları merkezi Qırım sakinleriniñ taqip etilmesinde qabaatlanğan 260tan çoq memurnı qayd etti", — dep bildirildi.
ZMINAnıñ haber etkeni kibi, memurlarnıñ "qara cedveli" Rusiye FSBniñ hadimleri, taqiqatçılar, prokurorlar, makemeciler, SİZO, apishaneler ve işğal etilgen Qırımnıñ tibbiy hızmetleriniñ reberleri aqqında malümatnı taqdim ete, olar on yıllıq işğal devamında insan aqlarınıñ bozuluvında ve halqara gumanitar uquqnıñ qaba bozuluvında iştirak ettiler.
Uquq qorçalayıcılar, Rusiye makemeleriniñ saytlarında Ukraina vatandaşlarına ait davalardaki makeme qararları aqqında malümat ket-kete yoq etilgeni sebebinden, memurlar aqqında malümat qıyınlaşqanını aytalar.
"Devlet hainligi ve diversiya maddelerine binaen davalarnıñ çoqusı, em zarar körgenlerniñ tuvğanları, em de cemaat içün gizli tutula. Böyle vaziyetlerde ya memurğa Ukrainada ya da çetelde şahsiy sanktsiyalarnı kirsetmek maqsadınen yeterli malümat olmaması içün açıq menbalardan malümatnı tapmağa imkân bermey ve qapalı olğan malümatqa irişimni sıñırlay", — dep ZMINA qayd etti.
Telegram, WhatsApp ve Facebookta Suspilne Qırım haberlerine abune oluñız
