İşğal etilgen Qırımda yerli sakinler Rusiye rejimine muqavemet köstermege devam eteler. İşğalci akimiyet bunı toqtatmaq içün bütün imkânlarnı qullana, şu cümleden cinaiy davalarnı uydura ve "Rusiye Silâlı quvetleriniñ itibarını tüşürgenler"ge para cezaları bere.
Ukraina prezidentiniñ Qırım Muhtar Cumhuriyetindeki temsilciligi, öz #рух_спротиву (#muqavemet_areketi) rubrikasında bunı bildirdi.
Temsilcilik işğalcilerge qarşı çıqqan ve repressiyalarnıñ qurbanı olğan Qırım sakinleriniñ misallerini ketirdi.
Ruslan Cepparov, Azovske (Qalay) köyüniñ sakini çat-ruletkada Qırımnıñ işğalden azat etilmesini beklegenini ayttı. Onı tutıp aldılar, videoğa özür soramağa zorladılar ve malümatnı işğalli makemege berdiler.
Aqmescitteki (Simferopol) Oleksiy Novikov içtimaiy ağlarda USQni destekley edi. O, ayrıca, halq ögünde afu soramağa mecbur etildi, oña qarşı protokol tizildi ve "makemege" berildi.
Aqyar (Sevazstopol) şeeriniñ sakini zenaatdaşlarınen subetleşip, Rusiye ordusınıñ areketlerini tenqit etti. Bu sebepten onı tutıp aldılar ve malümatnı sözde makemege berdiler.
Yaltada bir adamnı işğal ordularınıñ tehnikası aqqında malümat berüvde qabaatladılar. Dava "makemede" baqıla.
Aqyar şeeriniñ sakini "gumanitar yardım" toplama noqtasını ateşke berüv ve neft mahsulatınıñ anbarını yoq etmege tırışqanı içün 10 yılğa üküm etildi.
İşğalciler jurnalistlerge de muntazam surette basqı yapalar. ''Qırım'' qırımtatar gazetasınıñ muarriri Bekir Mamutov "çetel agentleri" olaraq adlanmayıp, media aqqında aytqanı içün para cezasını aldı. Bu, oña qarşı bir yılda açılğan üçünci dava.
Berilgen malümatqa köre, 2024 senesi ilk qış ayınıñ 17-ne qadar "Rusiye Silâlı quvetlerini itibardan tüşürüv" maddesine binaen 1126 dava qayd etildi. Çoqusı allarda işğalli "makemeler" 26,4 million rubleni aşqan para cezalarını belgiley.
Telegram, WhatsApp ve Facebookta Suspilne Qırım haberlerine abune oluñız
