İşğalciler tarafından 8,5 senege maküm etilgen ukraina siyasiy mabüsi Oleksiy Kıselöv "Vladimir merkezi" sert rejimli müstemlekesinden Murmansk şeerinde yerliler arasında "Ugolki" olaraq belli olğan 17-nci müstemlekege etap etildi. O, Herson vilâyetiniñ Geniçesk şeerinden 3 800 km uzaqlıqta buluna.
Siyasiy mabüsniñ oğlu Artem Kıselöv Suspilne Qırımnıñ tefsirinde bunı bildirdi.
O, babası ilk qış ayınıñ 2-nde Murmansk müstemlekesine etap etilgenini qayd etti.
"Şimdilik başqa bir şey belli degil. Şimdi yañı advokat onıñ kassatsiyasınen oğraşacaq ve babamnı ziyaret etmege imkânı olacaq", — dep qayd etti Artem Kıselöv ve qoştı ki, yañı advokat qıdırıla.
Hatırlatamız ki, bundan evel ukrain siyasiy mabüsi Oleksiy Kıselöv Murmansk SİZOda bulunıp, etapını bekley edi. Oğlunıñ aytqanına köre, ilâc ve kerekli şeylerniñ berilmesi qıyın edi, amma tuvğanları sağlığı içün kritik olğan ilâclarnı bermege devam ete.
Oleksiy Kıselöv aqqında ne bilemiz
2022 senesi oraq ayınıñ 22-nde Rusiye quvetçileri onı işğal etilgen Geniçeskte tuttılar, bundan soñ onı Qırımğa alıp kettiler ve SİZOda qapattılar.
Rusiye Cinayet qanunnamesiniñ 208-inci maddesiniñ 2-nci qısmına binaen Kıselöv, "Noman Çelebicihan adına batalyonda" iştirak etkeninde qabaatlandı. Bu teşkilât Rusiyede terroristik teşkilât olaraq tanıla. Rusiye prokurorlığı oña 10 senelik apis cezasını talap etti. Bundan da ğayrı, ukrainalı Qırımnıñ deñiz qamaçavında iştirak etkeninde qabaatlana.
Noman Çelebicihan batalyonınıñ tesisçisi Lenur İslâmov, Oleksiy Kıselövniñ oña alâqası bar olğanını red ete.
Kıselöv Geniçeskte olğan işkencelerni añlattı. Onı beş kün devamında qıynap, kamera qarşısında partizan areketiniñ yetekçisi olaraq itiraf etmesini talap ettiler.
2022 senesi orta küz ayınıñ 27-nde sabıq arbiy deñiz quvetleriniñ kapitanı, tutulğan kişiniñ ekim tarafından teşkerilmek ricalarına baqmadan, eki ay devamında tibbiy yardım kösterilmegeni sebebinden açlıq ilân etti. Bu eñ az altı halqara añlaşmanı boza.
2023 senesi kiçik aynıñ 17-de Canköyde işğalli makeme Kıselövni 8,5 sene sert rejimli müetemlekege üküm etti.
2023 senesi arman ayınıñ 22-nde Qırımnıñ işğalli İstinaf makemesi ükümni deñiştirmedi. İmayeci taraf qararğa şikâyet etmege planlaştıra.
2023 senesi orta küz ayınıñ 24-nde adamnı Rusiye Federatsiyasınıñ bşqa apishaneleri arasında eñ sert olğan "Vladimir merkezi" apishanesine etap ettiler. Şu sene boş ayda oña bir sene devamında ailesinden tek bir paket ve bir çanta almağa izin berdiler.
Telegram, WhatsApp ve Facebookta Suspilne Qırım haberlerine abune oluñız
