İşğalciler tarafından 8,5 senege maküm etilgen ukrain siyasiy mabüsi Oleksiy Kıselöv etapta buluna. Vladimir apishanesinde tutulğan soñ, Murmansk SİZOsına etap etildi, anda o, Rusiye lagerine etap etilmesini bekley.
Qırımtatar Maaliy Merkezine Oleksiy Kıselövniñ oğlu Artem Kıselöv haber etti.
Ukrain siyasiy mabüsi Oleksey Kıselöv, sabıq 1-nci derece kapitanı ve Ukraina Arbiy deñiz quvetleriniñ "Slavutıç" idare gemisiniñ sabıq komandanı, şimdi Murmansk SİZOda buluna. Onı endi bir qaç afta devamında etap eteler.
Qorantasınıñ aytqanına köre, Kıselövnıñ tutuv şaraiti qıyın qala. İlaç ve kerekli şeylerniñ ketirilmesi qıyın keçe, amma yaqınları sağlığı içün kritik olğan ilâclarnı bermege devam eteler.
Artemniñ aytqanına köre, babasınen körüşmege tek bir kere izin berildi — onı anası ziyaret etti.
Oleksiy Kıselöv aqqında ne bilemiz
2022 senesi oraq ayınıñ 22-nde Rusiye quvetçileri onı işğal etilgen Geniçeskte tuttılar, bundan soñ onı Qırımğa alıp kettiler ve SİZOda qapattılar.
Rusiye Cinayet qanunnamesiniñ 208-inci maddesiniñ 2-nci qısmına binaen Kıselöv, "Noman Çelebicihan adına batalyonda" iştirak etkeninde qabaatlandı. Bu teşkilât Rusiyede terroristik teşkilât olaraq tanıla. Rusiye prokurorlığı oña 10 senelik apis cezasını talap etti. Bundan da ğayrı, ukrainalı Qırımnıñ deñiz qamaçavında iştirak etkeninde qabaatlana.
Noman Çelebicihan batalyonınıñ tesisçisi Lenur İslâmov, Oleksiy Kıselövniñ oña alâqası bar olğanını red ete.
Kıselöv Geniçeskte olğan işkencelerni añlattı. Onı beş kün devamında qıynap, kamera qarşısında partizan areketiniñ yetekçisi olaraq itiraf etmesini talap ettiler.
2022 senesi orta küz ayınıñ 27-nde sabıq arbiy deñiz quvetleriniñ kapitanı, tutulğan kişiniñ ekim tarafından teşkerilmek ricalarına baqmadan, eki ay devamında tibbiy yardım kösterilmegeni sebebinden açlıq ilân etti. Bu eñ az altı halqara añlaşmanı boza.
2023 senesi kiçik aynıñ 17-de Canköyde işğalli makeme Kıselövni 8,5 sene sert rejimli müetemlekege üküm etti.
2023 senesi arman ayınıñ 22-nde Qırımnıñ işğalli İstinaf makemesi ükümni deñiştirmedi. İmayeci taraf qararğa şikâyet etmege planlaştıra.
2023 senesi orta küz ayınıñ 24-nde adamnı Rusiye Federatsiyasınıñ bşqa apishaneleri arasında eñ sert olğan "Vladimir merkezi" apishanesine etap ettiler. Şu sene boş ayda oña bir sene devamında ailesinden tek bir paket ve bir çanta almağa izin berdiler.
Telegram, WhatsApp ve Facebookta Suspilne Qırım haberlerine abune oluñız
