Ukraina prezidenti Qırım Muhtar Cumhuriyetindeki daimiy temsilcisiniñ vazifelerini vaqtınca eda etecek Olğa Kurışkonı tayinledi. 2023 senesi bozarğan aydan itibaren o, daimiy temsilciniñ muavini vazifesinde buluna edi.
Bunı Ukraina prezidentiniñ Qırım Muhtar Cumhuriyetindeki temsilciligi bildirdi.
Olğa Kurışko Temsilcilikniñ taqımına 2021 senesi ilk qış ayında qoşuldı. Öz faaliyeti vaqtında Olğa Kurışko Qırımnıñ reintegratsiyasınen bağlı strategik vesiqalarnıñ azırlanılmasında iştirak etti, em de işğal etilgen yarımadanıñ sakinleriniñ aqlarını qorçalavnen bağlı uquqiy ve normativ aktlar üzerinde çalıştı. Onıñ faaliyetiniñ yönelişleri arasında tasil, pensiya teminatı, pasport hızmetleriniñ teminatı, siyasiy mabüsler ve olarnıñ aile azalarına qoltutuv.
Hatırlatamız ki, ilk qış ayınıñ 4-nde Ukraina prezidenti Volodımır Zelenskıy, Tamila Taşevanı Ukraina prezidentiniñ Qırım Muhtar Cumhuriyetindeki daimiy temsilcisi vazifesinden çıqaruv qararını imzaladı. Yaqın vaqıtta Tamila Taşeva Ukraina Yuqarı Şurasında çalışmağa niyetlene. O, prezidentniñ taqımınen işbirligini toqtatmaycağını, Ukrainanıñ ğalebesi ve Qırımnıñ azat etilmesi içün çalışmağa devam etecegini qayd etti.
Telegram, WhatsApp ve Facebookta Suspilne Qırım haberlerine abune oluñız