Ukraina prezidenti Volodımır Zelenskıy, Tamila Taşevanı Ukraina prezidentiniñ Qırım Muhtar Cumhuriyetindeki daimiy temsilcisi vazifesinden boşatuv aqqında emirni imzaladı.
İlk qış ayınıñ 4-nde Facebookta Tamila Taşeva bu aqqında haber etti.
Öz muracaatında Taşeva preziden, zenaatdaşları ve halqara ortaqlarına işbirligi içün minnetdarlığını bildirdi ve Temsilcilikniñ muvafaqiyetlerini yekünledi.
Taşeva qayd etti ki, o bu vazifede bulunğan vaqıt Temsilcilik işğal etilgen Qırım ve onıñ sakinlerine qol tutuvnıñ esas aleti oldı. Hususan, taqım vatandaşlarnıñ 5 biñden çoq muracaatını baqıp çıqtı, işğalni terk etmege, vesiqalarnı ğayrıdan resmiyleştirmege ve tasil meselelerini çezmege yardım etti. Qırımlılarnıñ #10rokivSprotıvu (#10yıllıqMuqavemet) kibi muqavemetke qol tutuv kampaniyasını teşkil etti, o, 300den çoq bilbord, sitilaut ve başqa platformalarnı qapladı.
O, institutnıñ halqara destekniñ quvetleştirilmesinde rolüni qayd etti: Qırım platformasınıñ dört sammitini ve bir sıra diplomatik tedbirni teşkil etti. İşğalcilerniñ cinayetleri aqqında dünyağa malümat berüv, medeniy ve içtimaiy teşebbüslerge qol tutuv, qırımtatar halqınıñ aqlarını qorçalav işlerine ayrı diqqat ayırıldı. Bundan da ğayrı, 100-den çoq iştirakçini toplağan "Crimea Global" halqara konferentsiyasını başlattı.
"Taqımımıznıñ ğayretleri sayesinde Qırım platforması Qırımnın reintegratsiya meseleleriniñ çezilüvinde lider oldı. Bütün ortaqlarğa işbirligi içün minnetdarım ve adalet tiklenmesi içün küreşimiz devam etecegine inanam", — dep qayd etti Taşeva.
Yaqın kelecekte Tamila Taşeva Ukraina Yuqarı Şurasında çalışmağa niyetlene. O, prezidentniñ taqımınen işbirligini toqtatmaycağını, Ukrainanıñ ğalebesi ve Qırımnıñ azat etilmesi içün çalışmağa devam etecegini qayd etti.
Telegram, WhatsApp ve Facebookta Suspilne Qırım haberlerine abune oluñız
